Бунёдбек Саидов бугунги кунда Хоразм қўшиқчилари орасида энг кўзга кўринган ва талаб юқори бўлган хонанда. Унинг нафақат Ўзбекистондаги, балки хориж давлатларидаги концертлари ҳам ҳамиша шов-шувларга сабаб бўлади. У Марказий Осиё давлатлари ва бир неча бор АҚШда концерт дастурларини тақдим этган.
“Дарё” мухбирлари хонанданинг бу йилги концертида иштирок этиб, репортаж тайёрлади. Хонанда бу йилги концерт сўнггиси бўлишини, энди асосий эътиборини бошқа нарсаларга қаратиш ниятида эканлигини гапирди.
— Бу йилги концерт ижодимдаги энг қисқа вақт тайёргарлик кўрилган концерт бўлса керак. Чунки бирорта концертга бу қадар кам тайёргарлик кўрмаганман. Ташкилотчилар таклиф беришганида, бир оз иккиландим. Охири концерт кунлари белгиланишига бир ой қолганида розилик бердим. Кейин концертга икки ҳафта қолганида Тошкентга келиб, тайёргарлик кўришни бошладим, — дейди Бунёдбек Саидов.
Хонанда тўйларда ҳам фаол эмаслиги ва келажакдаги фаолиятини қандай давом эттирмоқчилиги ҳақида гапирди.
— Тўйларга ҳам деярли бормаяпман. Ижодга ҳам эътиборим анча сусайган. Шу боис бу йилги концертни самимий ва оддий қилиб ўтказишни ният қилдим. Мухлислар сўраган қўшиққа тайёрман. Карантин даври кўп ҳақиқатларни англашимизга сабабчи бўлди. Ёлғиз фарзандман, концерт ва ижод сабаб ота-онамга кўнгилдагидек эътибор бермаслигим мумкин.
Шу боис, узоқ ўйлаб бир қарорга келдим. Бу йилгиси охирги концертим бундан кейин бор эътиборимни яқинларимга, хусусан ота-онамга қаратмоқчиман. Менимча, мен шундай ёшга етиб келдим, — дейди хонанда Бунёдбек Саидов.
Хонанданинг бу йилги концерти ҳақиқатан ҳам махсус сценарийсиз ўтди. Чунки хонанда кўп қўшиқларини мухлисларининг талаби билан ижро этди.
— Буни концерт эмас, самимий учрашув деб қабул қилинглар. Истаган инсон ўйнасин, истаса мен билан қўшилиб қўшиқ айтсин. Бугунги кеча қолипсиз ўтишини хоҳлайман, — деди Бунёдбек Саидов.
Ботир Қодиров дўстини қўллаб-қувватлаш учун концерт бошидан охирига қадар саҳна ортида бўлди.
