Голливуд юлдузи Уилл Смит ўзининг Westbrook номли кўнгилочар компанияси орқали Paramount билан кўп фильмлик шартномага қўл қўйди, деб ёзади Вариетй.
Westbrook асосчиси Уилл ва Жада Пинкетт Смит компаниянинг бош мақсади Смит иштирокидаги кенг аудиторияга мўлжалланган “халқаро” фильмлар яратиш эканини таъкидлади. Шунингдек, бу лойиҳалар кейинчалик франчайзингга айланиши мумкинлиги айтилмоқда.
Ҳозирда иккита фильм устида иш олиб борилмоқда: “Шакар қароқчилари” ва “Қуён уяси”. Биринчиси ёзувчи Чак Хоганнинг “Сургундаги иблислар” асари асосида суратга олинмоқда. Унда Уилл Смит махсус бўлинма собиқ аскари, Бостондаги наркотик савдосига барҳам беришга бел боғлаган элита гуруҳ етакчиси сифатида намоён бўлади.
“Қуён уяси” лойиҳаси эса Дени Вилневнинг “Дун” фильмлари сценарийсини ёзган Жон Спейтс томонидан қаламга олинган. Уилл Смит компанияси иккала фильмдан тортиб келгусидаги барча режаларни Paramount'нинг Голливуд студияларида амалга оширишни режалаштирмоқда.
Westbrook 2019 йилда ташкил этилган бўлиб, компаниянинг энг йирик ютуғи “Қирол Ричард” фильми ҳисобланади. Мазкур асарда рол ижро этган Уилл Смит 2022 йилда “Оскар” мукофотига сазовор бўлган эди.
«Замин»ни Telegram’да ўқинг!
