Хонанда Иззатилла Шукуров “Миллий ифтихор” мукофоти билан тақдирланди. Ушбу қувончли янгиликни санъаткорнинг отаси — Тоживой Шукуров ўзининг Instagram саҳифаси орқали маълум қилди.
Эълон қилинган видеолардан кўринишича, Иззатилла ушбу хушхабарни энг аввало отасига етказиш учун унинг ёнига борган. У тантанали равишда қўлга киритган мукофотини отасига кўрсатиб, ҳаяжон билан: “Буларнинг барчаси сизники. Сизнинг меҳнатингиз ва сабрингиз шарофати билан”, — дея таъкидлади.
Отанинг қувончи чексиз эди. Тоживой Шукуров ўғлининг шундай юксак мукофотга муносиб кўрилганидан ғоят хурсанд эканини билдириб, ушбу эътироф бутун оила учун фахр эканини айтди. Шунингдек, у ўғлига бундан-да баландроқ марралар, янада юксак мукофотлар насиб этишини тилаб, самимий табрикларини йўллади.
Мазкур воқеа ижтимоий тармоқларда ҳам кенг муҳокамаларга сабаб бўлиб, кўплаб мухлислар Иззатилла Шукуровни ушбу ютуқ билан қизғин табрикламоқда.
Меҳмон гуруҳидаги фойдаланувчилар ушбу мақолага изоҳ қолдира олмайди.
