Фарғона вилоятидан етишиб чиққан таниқли хонанда Раҳматилло Юсупов 44 ёшида ҳаётдан кўз юмди. Мавжуд маълумотларга кўра, у сўнгги вақтларда оғир хасталик билан курашиб келган ва шифокорларнинг барча саъй-ҳаракатларига қарамасдан, унинг ҳаётини сақлаб қолишнинг иложи бўлмаган.
Марҳум санъаткор ўзининг самимий ижроси, дардли овози ва халққа яқин қўшиқлари билан кўплаб мухлислар қалбидан жой олган эди. Айниқса, “Кетгим келмаяпти онажон”, “Келинчак” каби қўшиқлари орқали кенг оммага танилди. Унинг саҳнадаги образи, қиёфаси ва ижро услуби кўп жиҳатдан марҳум устоз санъаткор Охунжон Мадалиевни эслатар эди. Шу боис, мухлислар ва санъат муҳити вакиллари орасида Раҳматилло Юсуповни “иккинчи Охунжон Мадалиев” деб аташ ҳолатлари ҳам учраб турарди.
Раҳматилло Юсупов 1981 йил 15 сентябрь куни Фарғона вилоятида туғилган. У ижодий фаолияти давомида 100 дан ортиқ муаллифлик қўшиқларини яратган бўлиб, уларнинг аксарияти муҳаббат, ота-она қадри ва ҳаёт ҳақидаги самимий кечинмаларга бағишланган эди. У қўшиқларида оддий одамлар туйғусини, дард ва умидларини жонли тарзда ифодалай олган хонандалардан бири сифатида эътироф этиларди.
Марҳум хонанда оилали бўлиб, икки нафар фарзанднинг отаси эди. Унинг бевақт вафоти нафақат яқинлари, балки бутун санъат ихлосмандлари учун оғир йўқотиш бўлди. Раҳматилло Юсуповнинг қўшиқлари эса уни севган мухлислар қалбида яна узоқ йиллар давомида янграб туриши шубҳасиз.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
