Бурак Денизнинг тест натижалари: кутилмаган ҳақиқат ошкор бўлди

Туркия киноси ва сериаллари орқали Ўзбекистонда ҳам кенг мухлислар орттирган таниқли актёр ва модел Бурак Дениз атрофида жиддий можаро юзага чиқди. Хабарларга кўра, унинг тиббий текширувлар учун топширган биологик намуналари — соч ва қон таҳлилларида гиёҳванд моддаларга оид излар аниқланган.

Бу ҳақда “Yeniçağ” нашри хабар тарқатган бўлиб, тергов жараёни доирасида Суд тиббиёт институтида ўтказилган лаборатор текширувлар натижалари оммага маълум қилинган. Унга кўра, фақат Бурак Дениз эмас, балки бир нечта таниқли шахсларнинг ҳам таҳлил натижалари муҳокамаларга сабаб бўлган.

Маълумотларга қараганда, актёр билан бирга кўриб чиқилган иш доирасида актриса Серра Пиринч ва Энес Гулер намуналарида ҳам “марихуана” ва “кокаин” моддалари аниқланган. Шунингдек, қўшиқчи Утку Унсал таҳлилларида "марихуана" излари, яна бир ижрочи Симге Сагинда эса дори воситалари таркибига кирувчи фаол модда қайд этилган.

Мазкур ҳолат турк шоу-бизнеси доирасида катта резонанс келтириб чиқарди ва ижтимоий тармоқларда кенг муҳокамаларга сабаб бўлмоқда. Айрим манбаларда Бурак Денизнинг келажаги, жумладан, реклама шартномалари ва кино лойиҳаларидаги иштироки хавф остида қолиши мумкинлиги айтилмоқда.

Шунингдек, актёрнинг аввал ҳам турли можароли вазиятларга аралашгани ҳақидаги даъволар яна бир бор эсга олинмоқда. Бу эса унинг обрўсига жиддий таъсир кўрсатиши мумкинлиги ҳақида тахминларни кучайтирмоқда.

Маълумот учун, Бурак Дениз 35 ёшда бўлиб, у ижодий фаолиятини 20 ёшида бошлаган. Унинг илк йирик лойиҳаларидан бири “Коллеж кундалиги” ёшлар сериали ҳисобланади. Кейинчалик “Қочоқ” сериали унга катта шуҳрат келтирган.

Шунингдек, у “Кичик ширин алдамчилар” лойиҳаси орқали ҳам томошабинлар эътиборига тушган. “Бизнинг ҳикоя” сериалидаги роли эса актёрни нафақат Туркияда, балки хорижий мамлакатларда ҳам машҳур қилди.