Актёр Шохруҳ Хамдамов "Мирсодиқова билан" кўрсатувида меҳмон бўлиб, дабдабали ва ортиқча ҳашаматга бой тўйлар масаласига ўз муносабатини очиқ билдириб ўтди.
Актёрнинг таъкидлашича, тўй масаласида энг муҳим нарса — имкониятни тўғри баҳолаш ва ортиқча исрофгарчиликка йўл қўймаслик: “Бир ишни бошласангиз, Оллоҳнинг ўзи баракасини беради. Менда ҳам шундай бўлган — тўйга ҳам, уйга ҳам етказган. Шунинг учун тўйни таваккал қилиб бошлаш керак, лекин бир шарти бор: кўрпага қараб оёқ узатиш лозим.”
У дабдабали тўйларнинг салбий оқибатлари ҳақида ҳам мисол келтирди: “Бир укам машҳур қизга уйланган. Ўзи оддий оиладан эди, лекин келин томон олдида уялиб қолмаслик учун 40 минг долларлик тўй қилди. Натижада, тўйдан кейин уч йил ўзига келолмади. Шунақа ҳаёт керакми?”
Актёр фикрича, катта тўйлар вақтинчалик таассурот қолдиради, холос: “Тўй ўтгач, барибир ҳамма унутади. Аммо қарз ва кредит эса одамнинг елкасида қолади. Мен бундай одамларни тушунмайман. Ҳатто баъзан 'ундан кўра тўй қилмаганинг яхши', дегим келади.”
Шохруҳ Хамдамов ўзининг бўлиб ўтган тўйи ҳақида ҳам гапириб ўтди: “Аслида мен тўй қилишга ҳам қарши эдим. Ихчамгина, уйда 10 кишилик оддий тўй қилишни ният қилардим.”
Мазкур фикрлар ижтимоий тармоқларда кенг муҳокама қилиниб, кўплаб кузатувчилар актёрнинг қарашларини қўллаб-қувватлашди.
“Zamin”ни Telegram'да ўқинг!
