«Монца» илк маротаба Италия А Сериясида ўйнайди

^{Фото: «Спорт-Экспресс»}
Италия собиқ бош вазири Силвио Берлусконига қарашли «Монца» клуби ўз тарихида илк марта А Серияда қатнашадиган бўлди.

Бу ерда ҳам юқори дивизионга 3-йўлланма тақдири Англиядаги каби юз берди: 3-ўрин («Пиза) ва 4-ўрин («Монца») эгалари ўртасидаги курашда сўнгги жамоанинг толеи кулди.

Биринчи ўйинда «Монца» 2:1 ҳисобида ғалаба қозонганди, иккинчи ўйиннинг асосий вақтида «Пиза» 3:2 ҳисобида олдинга чиқди ва икки ўйин бўйича натижалар тенглашгани учун қўшимча вақт белгиланди. Экстратаймларда иккита гол уришга куч топган «Монца» футболчилари 4:3 ҳисобидаги ғалаба билан ўз номларини тарихга ёзишди.

1912 йилда асос солинган «Монца» 110 йиллик тарихида биринчи марта А Серияда ўйнайдиган бўлди. 2018 йилдан бери жамоа акцияларининг назорат пакети собиқ бош вазир Силвио Берлускони қўлида.

B Серия ғолиби «Лечче» ва 2-ўринни эгаллаган «Кремонезе» янги мавсумдан А Серияда қатнашиши аввалроқ маълум бўлганди.

Янгиликлар