“Насаф”га келган легионернинг номи улуғ, супраси қуруқми?

Ўзбек футболида трансферлар мавсуми анча қизғин кечмоқда. Ёзнинг жазирама иссиғи ҳам жамоаларни олди-бердилардан тўхтата олмаяпти. Клублар иккинчи даврага таркибни кучайтирмоқда. Хориждан футболчилар олиб келаётганлар ҳам бор.

Бир неча кун аввал "Насаф" клуби сафига бразилиялик Матеус Лима Круз келиб қўшилди. Ҳужумчи қаршиликлар сафида кўрикдан ўтиб, жамоа билан 1 йиллик шартнома имзолади.

Лиманинг transfermarkt.com порталидаги нархи 200 минг еврони ташкил қилади. Унинг максимум нархи 2015 йили 400 минг еврогача чиққан.

Қаҳрамонимиз фаолияти давомида клублар миқёсида умумий ҳисобда 187 ўйинда майдонга тушиб, рақиблар дарвозасига 44 бор йўл топган. Матеус Лима Круз шу кунга қадар 7 та жамоа шарафини ҳимоя қилган. Дебютини 2012 йили бошлаган марказий ҳужумчи 12 бор клубини ўзгартирган.

Унинг охирги 5 йилликдаги карьерасига эътибор қаратсак, 3 жамоада 114 учрашув ўтказиб, 23 та гол урган.

2018 йилнинг ёзида Матеус Лима Хорватия Биринчи лигаси вакили “Славен Белупо” билан икки йиллик шартнома имзолади. 51 ўйинда 7 бор дарвозани ишғол қилди.

2020-2021 йилги мавсумни Исроилнинг “Хапоэль Ноф ҲаГалил” клубида ўтказди. 29 учрашувда 9 гол урди.

Кейинги мавсум эса бу мамлакатнинг бошқа жамоаси “Ҳапоэль Ришон ЛеЗион” клубида тўп тепди. 34 беллашувда 7 та тўп киритди.

“Насаф” легионерига айланган Лима 2020-2021 йили энг кўп голини урганди - 9.

Футболда статистика, рақамлар кўп нарсани англатади. Айниқса, юртимизга хориждан келаётган легионерлар борасида. Ушбу рақамлардан битта хулосага келишим мумки: “Насаф”га келган легионернинг номи улуғ, супраси қуруқ. Футболчи бразилиялик эканлигини инобатга олмаса, клубларда нимадир каромат кўрсатмаган. Ҳамма бразилияликлар ҳам Роналдо, Неймар бўлавермайди.

Боз устига бу футболчи легионерларни чертиб-чертиб танлайдиган Рўзиқул Бердиев жамоасига келмоқда. Хорижликлар борасида ўта синчков мураббий бу танловни қабул қилишда нималарга эътибор қаратгани шахсан мен учун қизиқ. Балки бу клуб раҳбариятининг қарори бўлиши мумкин. Лекин битта факт шуки, Лима "Насаф"нинг барча футболчиларидан гавдали ва баланд бўйли!

Клуб бу трансфер орқали иккинчи қаватдаги устунликни қўлга олишни мақсад қилгандир. Бироқ қаршиликларнинг рақиблари "Пахтакор", "Навбаҳор", "Сўғдиёна", АГМКга эътибор қаратсак, уларнинг барчасида баланд бўйли марказий ҳимоячилар бор. Лима улардан устунлик қилиши қийин масалага ўхшамоқда.

Бир мавсум давомида кўпи билан 9 та гол урган легионер юқорида билдирган фикрларимизни иккинчи даврадаги ўйинлари билан асоссиз эканлигини исботлаб берса, биз бундан фақат хурсанд бўламиз. Чемпионатимизга савияли легионерлар келишининг тарафдоримиз холос.


Манба: Sports.uz “Замин” янгиликларини “Инстаграм”да кузатиб боринг