Федор Емельяненко америкалик рақибдан нокаутга учради (видео)

^{Фото: ТАСС}
Россиялик жангчи Федор Емельяненко фаолиятидаги сўнгги жангда америкалик Райан Бейдерга ютқазди. Бу АҚШнинг Калифорния штати Инглвуд шаҳрида бўлиб ўтган Bellator 290 турниридаги асосий жанг эди.

Беллашув биринчи раунддаёқ якунланиб, 2 дақиқаю 39 сония давом этди. Бейдер иккинчи дақиқада россияликни ортга қулатди. Кейин Емельяненко партерда чалқанча ётган ҳолда зарбалар сериясини ўтказиб юборди ва ҳакам жангни тўхтатди.

Шу тариқа, Емельяненко Бейдердан оғир вазн тоифасида Bellator чемпионлик камарини тортиб ололмади.

Бу ушбу россияликнинг Бейдерга қарши иккинчи жанги бўлди. 2019 йил январида у оғир вазн бўйича Bellator Гран-приси финалида америкалик рақибига қарши жангнинг 35-сониясидаёқ нокаутга учраганди. Бейдер Емельяненкони икки бор мағлуб этган тарихдаги илк жангчига айланди.

46 ёшли россиялик — тўрт карра Pride FC чемпиони ва икки карра RINGS чемпиони. У бир неча бор вазн тоифасидан қатъи назар турли версияларда энг яхши жангчи деб топилган. У фаолияти давомида 48 жанг ўтказиб (биттаси ҳисобланмаган) 40 бор ғолиб бўлган. Аввалроқ ушбу MMA афсонаси Бейдерга қарши жанг унинг фаолиятидаги охирги жанг бўлишини айтганди. Жангдан кейин ҳам у кетишини узил-кесил тасдиқлади.

39 ёшли Бейдер эндиликда ММА турнирларидаги ғалабалари сонини 31 тага етказди, у етти бор мағлубиятга учраган, яна бир жанги ҳисобланмаган.

Федор Емельяненко, Райан Бейдер, Bellator чемпионлик камари, Нокаутга учради “Замин” янгиликларини “Инстаграм”да кузатиб боринг