Футбол юлдузи Криштиану Роналдунинг 2022 йили Қатарда ўтказилган жаҳон чемпионатидан кейин кутилмаганда Европа футболидан воз кечиб Саудия Арабистонининг “Ан-Наср” жамоасига кўчиб ўтгани ҳамон кенг муҳокамаю мунозараларга сабаб бўлмоқда.
Роналдунинг бошқа қитъага кўчиб ўтишига мундиал вақтида "Манчестер Юнайтед" раҳбариятининг тажрибали ҳужумчи билан хайрлашишга қарор қилгани туртки бўлди. Манчестерликлар Роналдунинг матбуотда чиқиш қилиб, клуб раҳбарияти ва бош мураббий Эрик тен Хагни кескин танқид қилгани ортидан шартномани бекор қилди.
Айрим мутахассислар Роналдунинг “Ан-Наср”га ўтиши бутун Осиё қитъасида футболнинг янада оммалашуви ва ривожланишига ижобий таъсир кўрсатишини таъкидламоқда. Роналдунинг бу трансферга розилик бергани Европада порлаган ва ҳозир ҳам юлдуз даражасида юрган машҳур футболчиларни олиб келишга пойдевор бўлмоқда.
Араб клублари Роналдудан кейин катта клубларнинг таниқли ўйинчиларига оғиз сола бошлади. Хусусан, “Ан-Наср”нинг ашаддий рақиби “Ал-Ҳилол” португалиялик юлдуз билан 15 йилдан ортиқ вақт мобайнида рақобатлашиб келаётган Лионель Мессини ўз сафига чорлаётгани ва амалдаги жаҳон чемпионига 400-500 миллионлаб йиллик маош таклиф қилаётгани ҳақидаги маълумотлар тобора кўпайиб бормоқда.
“Ан-Наср” президенти Муҳаммад ал-Муаммар вақт ўтиши билан Криштиану Роналду трансферидан кўзланган асосий мақсадни ошкор қилди.
- Биз Криштиану Роналду билан ўйинчи сифатида шартнома тузишдан ташқари, унинг шахсий тижорий ҳуқуқларини ҳам қўлга киритдик. Бу ҳуқуқлар жорий мавсум якунланиши билан кучга киради ва мамлакатда туризм ҳамда бошқа қатор соҳаларнинг ривожланишига ижобий таъсир кўрсатади.
Вақт етишмаслиги ҳамда спорт мусобақаларининг тиғиз тақвими туфайли биз “Ан-Наср”нинг Роналду билан шартномасининг ўзига хос жиҳатларини кўрсата олмадик.
“Ан-Наср”нинг медиа маркази ва коммуникацияларга масъул бўлими оддий хабарларни тарқатиш билан шуғулланяпти холос.
Мен “Ан-Наср” футболчиларига ҳар доим бир гапни таъкидлайман: “Ёнингизда Криштиану Роналду ўйнаётганидан унумли фойдаланиб қолинг, ўзингизни кўрсатинг, чунки учрашувларимизни мунтазам равишда 50 дан ортиқ телеканаллар тўғридан тўғри трансляция қиляпти”, - деди Муҳаммад Ал-Муаммар.
Маълумки, “Ан-Наср” жамоасида Ўзбекистон миллий терма жамоаси етакчиларидан Жалолиддин Машарипов ҳам тўп тепмоқда. Легионеримиз жамоага Криштиану Роналду келгунга қадар 7-рақамда ўйнарди.
Жалолиддин Машарипов португалиялик юлдузга унинг севимли рақамини бўшатиб берди ва ўзи 77-рақамни танлади.
Криштиану Роналдунинг “Ан-Наср” билан амалдаги шартномаси 2025 йилнинг 30 июнигача тузилган ва португалиялик юлдуз ҳар мавсум учун 200 миллион евро маош олиши белгиланган.
“Ан-Наср”га келганидан бери Криштиану Роналду Саудия Арабистони чемпионатида 14 маротаба майдонга тушиб, рақиблар дарвозасини 13 марта ишғол қилди ва жамоадошларига бир жуфт голли пас узатди.
“Замин” янгиликларини “Одноклассники”да кузатиб боринг
