Гватемала бизга қарши қандай ўйнайди?

Бугун тунда Ўзбекистон U-20 терма жамоаси ЖЧ гуруҳ босқичидаги сўнгги ўйинини Гватемала термасига қарши ўтказади. Биласиз, гуруҳларда 1 чи ва 2 чи ўринни олганлар тўғридан-тўгри плей-оффга йўл олишадиган бўлса, энг яхши 4 та 3 чи ўрин соҳиблари ҳам нимчорак финалга чиқишади. Ортиқча математик ҳисоб-китобларга ҳожат йўқ. Ҳозирда бисотимизда 1 очко бор ва сўнгги турда фақат ғалаба қозонилсагина имконият сақлаб қолинади.

Хўш Гватемала қандай жамоа, ўзи уларни енгса бўладими? Албатта бўлади. Замонавий футболда мағлуб қилиб бўлмайдиган бирор жамоа йўқ. Рақибга нисбатан тўғри услуб танланса, футболчилар режа бўйича ҳаракат қилсалар бас.

Рақиб хусусида

КОНКАКАФ вакили ҳисобланган Гватемала саралашда «Г» гуруҳидан жой олади. Илк туда Салвадорга мағлуб бўлгач, 2 чи ва 3 чи турларда дастлаб Панама кейин эса Аруба (Кариб денгизи атрофидаги давлат) термалари мағлуб қилинади. Шу тариқа гуруҳда 6 очко тўплаб иккинчи бўлган терма плей-оффга йўл олади. Нимчорак финалда Канада, чорак финалда эса Мексика термалари пенальтилар сериясида мағлуб қилингач мундиал йўлланмаси қўлга киритилади. Ўхшашлик бора?! Бизникилар ҳам айнан пенальтилар сериясида дастлаб Австралияни кейин эса Жанубий Кореяни мағлуб қилишганди. Кўриниб турибдики рақиб ўзига керакли ҳисобни ушлай олади ва ортиқча ҳаяжонга берилмайдиган иродали жамоа.

Гватемала мундиалдаги ўтган икки турни икки хил ўтказди. Илк турда Янги Зеландияга қарши ўйинда устунликка эришиб мағлуб бўлди, иккинчи турда эса Аргентинага қарши ҳеч нима қила олмади. Бош мураббий Рафаэл Лоредо ўтган турларда рақибдан келиб чиқиб 2 хил услубни танлади. Дастлаб Янги Зеландияга қарши ўйинда ҳужумкор 4-3-3 схемаси, Аргентинага қарши ўйин учун эса ҳимоявий 5-4-1 схемаси танланди. Ўтган ўйинлардан шуниси маълум бўлдики, рақибларимиз ҳужумда ўйнашсалар хавфлироқ.

Сўнги тур олдидан жамоаларда кайфият қандай?

Гватемала айни пайтда «А» гуруҳида сўнгги ўринда бормоқда. Тўплар фарқи эса -4. Рақибларимизнинг сўнгги тур олдидан плей-оффга чиқиш имкониятлари деярли қолмаган. Шу сабабли ҳам улар уйга қайтиш олдидан мухлисларини хурсанд қилиши учун чиройли ўйин кўрсатиб ғалабага интилишлари табиий. Катта эҳтимол ҳужумкор услуб танланади ва очиқ ўйин таклиф қилинади. Бундай ўйинларда эса қарши ҳужумларда самаралироқ ҳаракат қилган жамоалар ютади.

Сўзсиз, 2 чи турдаги ажойиб «камбек»дан сўнг йигитларимизда кайфият зўр. Катта эҳтимол, ортиқча босим ҳам йўқ (негаки жамоа бир неча бор қийин вазиятларда ирода кўрсата олди ) . Йигитларнинг Осиё чемпионатидаги муҳим ўйинлардаги ҳал қилувчи лаҳзаларда ўзларини яхши томонлама кўрсатишгани, босимни енгиб ўтишгани инсон кўнглига хотиржмалик бағишлайди. Мундиал остонасида Австралияга сўнгги дақиқаларда мағлуб бўлатуриб ирода кўрсатган жамоанинг бугунги баҳсда хотиржам тарзда ҳаракат қилиб зафар қучишига ишонаман.