Ёзги трансферлар ойнасида асосан футболчиларни Саудия Арабистонига йўл олганига гувоҳ бўляпмиз, лекин Европа клублари ҳам бозорда ҳаракатни анча кучайтириб олган. Айниқса, "Арсенал" ва "Челси" кўплаб трансферлар устида ишламоқда. Шунингек, АПЛнинг яна бир қатор жамоалари ҳам жим қараб тургани йўқ. Сиз эса қуйида тез орада эълон қилиниши кутилаётган трансферлар ҳақида билиб олишингиз мумкин.
Сандро Тонали
"Милан" ярим ҳимоячиси кутилмаганда "Ньюкасл"га ўтишга қарор қилди. Унинг кўп йиллар Миланда қолиши ва келажакда жамоанинг лидерларидан бўлишига ишонилган, бироқ футболчи Премьер-лигада фаолиятини давом эттиришга рози бўлди. Бизга воқеа мана шундай кўриниши мумкин. Аммо "Re Publica" нашрига ишонадиган бўлсак, у қолишни афзал кўрган, лекин клуб раҳбарияти катта сумма ишлаб олишини билганидан кейин футболчи билан ўзара суҳбатда барча ҳақиқатлар айтилган ва Тонали йиғлаб юборган. Сандро бўйича томонлар келишиб олди. Трансфер "қарғалар"га 70 миллион еврога тушадиган бўлди. Бу ҳафта ярим ҳимоячининг ташрифи расман эълон қилинмайди. Сабаби, шартномада ҳали чала жойлари бор. Тонали "Ньюкасл" билан 2029 йилгача амал қиладиган битимга имзо чеккан. 23 ёшли итальянни олиб келиш орқали инглиз клуби ярим ҳимоясини анча кучайтириб олмоқда.
Матео Ковачич
"Челси"ни тарк этаётган сони борган сари ошиб бормоқда. Зиеш, Кулибали, Обамеянг, Хаверц, Маунт ва Аспиликуэта бу ёзда бошқа клубга ўтиши деярли аниқ бўлиб улгурган. Улар орасида Ковачич ҳам бор. Хорватиялик ярим ҳимоячи учун шаҳарликлар" "Челси"га 30 миллион фунт тўлади. Футболчининг ўзи билан аллақачон шахсий келишув амалга ошган. У фақатгина тиббий кўрикдан ўтиши қолди. Шундан кейин бу трансфер расман эълон қилинади. Таъкидлаш жоиз, Ковачич Гюндоган ўрнига келмаяпти. Матео учун ҳаракат олдинроқ бошланган. "Манчестер Сити" Илкай ҳали сўнгги қарорини қабул қилмасидан аввал уни олиб келишни режа қилганди.
Илкай Гюндоган
Германиялик футболчининг кейинги манзили "Барселона" бўлади. Унинг олдида бир қанча вариантлар бор эди: "Манчестер Сити"да қолиш, ПСЖга ўтиш ва Саудия Арабистонига йўл олиш. У Испанияга кўчиб ўтишни танлади. Бошқа клублардан келган таклифлар Каталония жамоасиникидан анча яхшироқ бўлган. Аммо 32 ёшли немис "Барса"ни танлади. Бу қарорни қабул қилишга Левандовски маслаҳат бергани ҳақида Польша нашрлари хабар берди.
Бундан ташқари, Тер Штеген ҳам Гюндоганни "Барса"га келишига ҳаракат қилган. Хави бу трансферни амалга ошишини жуда ҳам хоҳлади. Мураббий Илкай билан ўзаро суҳбатлашиб, унга келажакдаги режалари ҳақида гапириб берган. Хуллас, Гюндоган кейинги ҳафтада эркин агент сифатида "Барселона"га ўтади.
Кай Хаверц
Хаверцнинг "Арсенал"га ўтиш эҳтимоли жуда баланд. Футболчи Артетанинг асосий футболчиларидан бири бўлиши мумкин. Сабаби, испаниялик мутахассис уни ўзининг энг юқори даражасига қайтаришига ишонмоқда. "Канонирлар" мазкур трансферга 65 миллион фунт тўлади. Улардан бошқа ҳеч қайси жамоа Кай учун бунча сарфлашни истамаганди. Бундан кўринадики, Артета сўнгги икки йилда "Челси"даги фаолияти орқали мақтана олмайдиган ярим ҳимоячини сотиб олишдан қўрқмади, яъни уни услубига тушишига ишонди.
Энди буни амалда кўрсатиши керак бўлади. Хаверц "Арсенал"да 29-рақамни олади. У эндиликда эски позицияси бўлмиш ҳужумкор ярим ҳимоя зонасида ўйнайди. Якунига етган мавсумда германиялик футболчи "аристократлар"да ҳужумчи етишмаслиги туфайли, страйкер вазифасини ўтаётганди. Хаверцнинг трансферини эълон қилиш ҳам кейинги ҳафтага қолган. У катта эҳтимол билан душанба куни таништирилади.
Николас Жексон
"Челси" кетганларнинг ўрнини тўлдириш учун ҳаракатни бошлади. Почеттино хоҳлаётган футболчиларни олиб келиш ишлари ҳозирча ёмон кетмаяпти. Клуб "Вильярреал"дан Николас Жексонни сотиб олмоқда. Ҳужумчининг ташрифи бир қатор ёш форвардларнинг ижара асосида бошқа жамоага ўтишини англатиши мумкин. Датро Фофана ва Армандо Брохага бир нечта клублардан қизиқишлар борлиги ҳақида миш-мишлар тарқаляпти. Жексон "сариқ сувости кемаси"дан 35 миллион фунт эвазига Лондонга келмоқда. Ҳужумчи шу ҳафта охирида тиббий кўрикдан ўтади ва трансфер расмий ҳолда маълум қилинади. 22 ёшли футболчи қишда "Борнмут"га ўтишга жуда яқин келиб, энди фаолиятини "Челси"да давом эттиради.
“Замин” янгиликларини “Facebook”да кузатиб боринг
