Coca Cola Суперлигаси 13-турида "Насаф" майдонидаги мағлубиятдан кейин ОКМК мураббийи Миржалол Қосимов иштирок этди.
- Иккита бир-бирига жуда муносиб, тўп билан яхши муомала қиладиган жамоа ўзаро баҳс олиб борди. Баҳснинг дастлабки 15 дақиқасида рақибга тўлиқлигича мағлуб бўлдик. Йигитларга ўйиндан олдин стандартларда Алиқулов, Эшмуродовлар хавфли эканлигини таъкидлагандик. Биринчи бўлимнинг 3-дақиқасида гол ўтказиб юборган бўлсак, иккинчи бўлимнинг ҳам учинчи дақиқасида гол қўйиб юбордик. Бу эса ўйин тақдирини ҳал қилди. Лекин ҳақиқатдан ҳам мухлисларбоп ўйин бўлди. Иккала жамоа ҳам курашди. "Насаф" жамоасини ғалаба билан табриклайман. Ўйинда жуда кўп марта кераксиз жойларда тўпни йўқотдик. Иккинчи бўлимда ўтказиб юборган голимиз ҳам бунга мисол.
- Сияваш Ҳақназарийни нега захирада қолдирдингиз?
- Бугунги ўйинга схемамиз бошқачароқ эди. Шу сабабли унга иккинчи бўлимга тайёр туриши кераклигини айтгандик. Регламент бўйича фақатгина 11 футболчи майдонга туша олади.
- ОКМК 33-дақиқадан кейингина ўйинни ўз томонига оғдиришни бошлади. Бу Сизнинг кўрсатмангизми?
- "Насаф" ҳам яхши жамоа. Биринчи бўлимда бизга концентрация етишмади. Биз эса кўп тўп йўқотдик. Ўзи "Насаф" жуда кучли жамоа, бу эса уларга янада кўп вазиятлар яратишда ёрдам берди. Бу футбол.
- Бугун Рубен Санчес қайдномада кўринмади. У жамоадан кетдими?
- Йўқ, кетгани йўқ. Таркибда жароҳатлар сабабли муаммолар бор. Масалан, Мартин майдонга тушмади. Шу сабабли Рубен қайдномага киритилгани йўқ.
- Демак, Мартинда ҳам жароҳат бор.
- Шундай. Олдинда ўйинлар кўп. У ўзини кўрсатиши учун бемалол вақт бўлади. У сўнгги ўйинда қўлидан жароҳат олганди.
- Сияваш Ҳақназарийга сўнгги ўйинларда кўп ҳам ишонч билдирмаяпсиз.
- Бу Сизга шундай кўринаётгандир. Ҳозир ҳамма футболнинг мутахассиси бўлиб кетяпти. Аммо ҳаётида ҳали бирор футболчини алмаштирмаган. Менда 20та футболчи бор, ҳеч кимни алоҳида ажратмайман. Барча футболчи жамоага ёрдам бериши керак.
“Замин” янгиликларини “Telegram”да кузатиб боринг
