Биринчиси - Жаҳон чемпионати йўлланмасига эга чиқиш;
Иккинчиси - Финалга чиқиш;
Учинчиси - Чемпион бўлиш.
Катталар футболидан фарқли ўлароқ ўсмирлар ва ёшлар чемпионатида ЖЧ йўлланмаси энг аввал ҳал қилинади. Чунки чорак финалдан ўтдингиз дегани - ЖЧ йўлланмаси чўнтакда дегани. Буёғига натижа қандай бўлишидан қатъий назар, ярим финалга етиб келган 4та жамоа U-17 жаҳон чемпионати иштирокчиси ҳисобланади.
Таиландда бўлиб ўтаётган U_17 Осиё чемпионатида Ўзбекистон ўсмирлар терма жамоаси бирламчи вазифани уддалади. Аввалги босқичда Саудия Арабистонини 2:0 ҳисобида мағлуб этиш билан бирга ҳам ярим финалга йўл олдик, ҳам ЖЧ чиптасига эга бўлдик.
Энди иккинчи вазифани бажариш турибди: ярим финалда Жанубий Кореяни мағлуб этиб, финалга чиқиш. Иккинчи вазифа бажарилса учинчиси ҳақида ўйлаймиз, аммо бунга ҳали эрта. Аввал кореяликлар тўсиғидан ўтишимиз керак.
Жанубий Корея бу - Саудия Арабистони эмас, уларнинг футболи анча яхши. Мазмунли, ҳам сифатли. Тезлик борасида улардан қолишмаймиз, техника борасида ҳам ортда эмасмиз, жисмоний куч борасида ҳам кураша оламиз. Фақат битта жиҳатда улардан ортда бўлишимиз мумкин: тез фикрлаш, тез қарор қабул қилиш.
Футбол - юксак ақл талаб этиладиган ўйин. Ва одатда ақл ва фикрлаш томонлама устун жамоа ғалаба қозонади. Жанубий Корея тўсиғидан ўтиш учун улар каби тез фикрлай олишимиз керак. Тезкор қарор чиқариш фақат фойдамизга хизмат қилади деб ўйлайман. Улар каби тез фикрлаб улар даражасига чиқамиз ва уларни шу йўл билан енга оламиз.
Тактика, техника, тезлик, жисмоний куч - бу томонлама муаммо йўқ, Худога шукур. Энди тез фикрлаш ҳам керак. Майдонда уйқусираб Кореяни юта олмаймиз. Бир муддат мудраб қолсангиз, улар гол уриб ютиб кетади. Шундай экан, асло "ухлаб қолманг", ҳамиша тетик бўлинг, 90 керак бўлса 120 дақиқа ҳушёр туринг, Яратганнинг ўзи бизни қўллайди.
P.S. Нақиб қилса, эртадан учинчи мақсад ҳақида гапиришни бошлаймиз.
