Жанубий Корея К-лигасининг 35-туридан ўрин олган "Чонбук Моторс" — "Похан Стилерс" учрашувида (1:1) баҳсли ҳолат юзага келди.
Мазкур баҳснинг 21-дақиқасида "Похан Стилерс"нинг ўнг қанот ҳимоячиси Ким Йонг Хван рақиб жамоа вакили Ким Жин Су билан тўқнашиб кетиши оқибатида оёғидаги оғриқдан шикоят қилиб, тиббиёт ходимларига мурожаат қилди. Шу боис, "Похан Стилерс" бош мураббийи Ким Ки Донг Шин Гван Хунни захирадан майдонга туширди.
Бироқ тахминан 6 дақиқадан сўнг ўйин тўхтатилди. Бош ҳакам ва ёрдамчи ҳакам Шин Гван Хунни майдонга тушириш вақтида муаммо юзага келганини кеч англаб етди.
Захира ҳаками таблога ўйиндан олиниши керак бўлган 3-рақам ўрнига адашиб 7-рақамни киритиб юборган. Натижада ўйинга қўшилган 17-рақамли футболчи Шин Гван Хун жароҳат олган ҳимоячини эмас, балки жамоа сардори Ким Ин Сеонгни алмаштириши керак бўлган. Бироқ шериги алмаштирилишига амин бўлган Ким Ин Сеонг ўйинни давом эттирди.
Гарчанд 3-рақамли футболчи майдон четида тиббий ёрдам олиш билан банд бўлган бўлса-да, расмий равишда захирага олинмаганди.
Натижада "Похан Стилерс" 6 дақиқа давомида 12 нафар футболчи билан ҳаракат қилди.
Учрашувдан кейин "Чонбук Моторс" жамоаси регламентга мувофиқ, рақибга техник мағлубият ёзилишини талаб қилиб, шикоят билдирган. Вазият кўриб чиқилмоқда.
“Замин” янгиликларини “Facebook”да кузатиб боринг
