Россия Премьер-лигасининг биринчи давраси асосий кашфиёти бўлган Аббосбек Файзуллаев мусобақанинг иккинчи ярмини ҳам жуда зўр бошлади. ЦСКА майдонида ўтган пойтахт дербисида легионеримиз “Динамо” ҳимоя чизиғини анча қийнаб қўйди.
20 ёшли ҳужумкор футболчимиз биринчи бўлимда ўзи зўр гол урди. Кейин жамоадоши Антон Заболотнийга жуда аниқ пас узатиб, битта ассист ҳам қайд этди. Гарчи “армиячилар” 2:3 ҳисобида мағлуб бўлган бўлса-да, ўзбек легионерининг ўйини кўпчиликка маъқул келди.
Учрашувдан кейин ЦСКА бош мураббийи Владимир Федотов жамоасининг ўйини ва хусусан, Аббосбек Файзуллаевнинг ҳаракатларига ўз муносабатини билдирди.
- Рақиб иккинчи бўлимда ўйинини сезиларли даражада кучайтира олди. Биз эса, ўйинни муваффақиятли бошлаганимизга қарамай, беллашувнинг иккинчи ярмида ташаббусни уларга бериб қўйдик.
Жуда осон голларни ўтказиб юбордик. Ресурслармиз етишмади. Мендес ва Давила терма жамоадан яқинда етиб келди. Клуб мураббийи сифатида терма жамоалар тақвимига эътирозларим бор.
Биз терма жамоаларга тайёр ўйинчиларни жўнатяпмиз. Улар эса ҳорғин ҳолда қайтиб келяпти ва уларнинг тикланишига вақт етишмаяпти. Масалан, чилилик ўйинчиларимиз ўйин олди машғулотларига етиб келди холос. Бунақа юкламани организм кўтариши мумкин, лекин самарадорлик пас бўлади.
Бизга ўйинни ташкил қилишда баланс етишмаслиги банд бермоқда. Такроран айтаман, рақиб иккита голни осонликча уришига йўл қўйиб бердик. Бу ҳолатни таҳлил қилиб чиқамиз. Чунки етарлича сабабларимиз бор.
Бизга трансферлар етишмаяпти. Буни “Динамо”га қарши ўтказилган учрашув ҳам кўрсатди. Биз буни ҳазм қилиш ва вазиятдан чиқишга мажбурмиз. Аввалги ўйинларда буни уддалай олгандик.
Кейинги ўйингача вақт кам. Лекин қўлимиздан келганини қиламиз. “Динамо”ни ҳам эътироф этиш лозим. Улар муҳим вазиятларда жуда яхши ўйнади. Танаффусгача ҳисобни йириклаштиришимиз керак эди.
Набабкин – бизнинг жокеримиз. Қайси позицияни янгилаш керак бўлса, унинг хизматларидан фойдаланамиз.
Файзуллаев жамоага жуда яхши киришиб кетди. Ҳозир у рақобатдан холи, иштиёқ билан ўйнаяпти. Лекин у ўзини кўрсатган учрашувларда жамоанинг ҳам ҳаракатлари борлигини эътироф этишим керак.
Жамоамизда бу ўйинчи жуда тез ўсаётгани жуда ёқимли. Файзуллаевга ўхшаган трансферларни кўпроқ бўлишини истардим, - деди Владимир Федотов.
«Замин» янгиликларини «Вконтакти»да кузатиб боринг
