Январ – трансферлар вақти. Бу вақтда Европа клублари муаммоли позицияларга янги футболчиларни таклиф этиб, мавсумнинг биринчи қисмида юзага келган муаммоларини ҳал қилиб олиши мумкин. Ёки ёзда эълон қилинадиган трансферлар бўйича келишувга эришиб олинади. Қуйида бу сафарги қишки трансферлар ойнасида қандай ўтишлар кутилаётгани ҳақида маълумотга эга бўласиз.
Килиан Мбаппе: «ПСЖ» → «Реал»
2024 йил кириб келиши билан Килиан Мбаппе клублар билан ёзги трансфер учун музокара олиб бориш ҳуқуқига эга бўлди: француз ҳужумчисининг «ПСЖ» билан шартномаси муддати 30 июнда якунланади, аммо унда шартномани узайтириш бўйича банд ҳам бор, шунинг учун форварднинг келажаги ҳамон мавҳум бўлиб қолмоқда. Кутилганидек, ОАВда «Реал» томонидан қизиқиш тўғрисидаги хабарларнинг янги тўлқини бошланди.
Килиан Мбаппе. Фото: Getty Images
Бу ҳақдаги илк хабарлар 29 декабр куниёқ чиқишни бошлаганди. Marca мадридликлар клуби Килиан билан январнинг илк кунларида музокара ўтказиб, 2022 йил бошидаги таклифларини такрорлаши ҳақида ёзди. Флорентино Перес Мбаппега 26 миллион евро миқдорида йиллик маош ва шартнома имзолашга рози бўлиши учун 130 миллион евролик бонус таклиф этиши айтилди. Катта эҳтимол билан, бу якуний таклиф бўлади: «Реал» кийим алмаштириш хонасидаги муҳитни бузмаслик учун, унга ҳаддан ортиқ маош таклиф қилмоқчи ва рақобатчилар билан пойгада қатнашмоқчи эмас. Шу билан бирга, клуб масала шу ойдаёқ узил-кесил ҳал бўлишини истайди.
Агар Мбаппе Переснинг таклифини яна бир бор рад этса, «Реал»дагилар Килиан номзодини буткул унутади. Мадридликлар президенти бу ҳолатда Эрлинг Ҳоландга эътибор қаратди, Флорентино уни француз ҳужумчиси билан бир хилда баҳолайди.
Журналистлар яна Карло Анчелоттидан Мбаппе ҳақида сўрашни бошлашган. Италиялик мутахассис ОАВ вакилларининг саволларини қўлидан келгунча қайтармоқда: «Сиз [савол берган журналистга қарата] мен бу ҳақда гапирмаслигимдан хабардор бўлмаган янгилардан бўлсангиз керак. Мен бу мавзуга тўхталмайман».
Шу билан бирга, Килианнинг онаси Файза Ламари Мадрид билан ҳозирги музокаралардан норози экани ҳақида хабарлар тарқалган. Бу кўп жиҳатдан испан матбуотида Мбаппега ултиматум қўядиган Переснинг тажовузкор музокара услуби ҳақида турли инсайдлар чоп этилиши билан боғлиқ. Файза бундай мақолалар «Реал» президенти буюртмаси билан ёзилаётгани ва унинг ўғлига босим ўтказаётганини айтмоқда. Кейинроқ мадридликлар бош директори Хосе Анхел Санчес Файзани тинчлантиргани ва у билан очиқ музокараларга киришгани ҳақида хабарлар пайдо бўлди.
Ҳозирча матбуотда «Реал»нинг Мбаппе учун пойгадаги ягона рақобатчиси ҳақида хабар чиққан — бу «Ливерпул». Мерсисайдликлар ушбу французни Муҳаммад Салоҳ учун муносиб ўринбосар бўлади деб ҳисобламоқда — мисрлик ҳужумчининг шартномаси 2025 йилда якунига етади, аммо у жамоани шу йил ёзидаёқ тарк этиши мумкин: 31 ёшли вингерга Саудия Арабистонидан қизиқишлар бор.
«ПСЖ»дагилар эса, албатта, Мбаппени қўйиб юборишни истамайди. L'Equipe хабарига кўра, пойтахт клуби бу масалада оптимистик кайфиятда ва Килиан жамоада ўзини бахтли ҳис қилаётганига ишончи комил. Улар француз клуб билан шартномани узайтиради ва у ҳеч қаерга кетмайди, деб ҳисобламоқда. Парижликлар учун Мбаппе — асосий актив, уни асосий етакчига айлантириш учун Неймар ва Месси билан хайрлашилган. Қолаверса, Мбаппе кетадиган бўлса, «ПСЖ»да суперюлдузлар қолмайди, Ҳоланд калибридаги бошқа футболчилар эса АПЛ ёки «Реал» ва «Барселона»га ўтишни афзал кўради.
Мэйсон Гринвуд: «Манчестер Юнайтед» → «Барселона»/«Атлетико»
«Манчестер Юнайтед» тарбияланувчиси севган қизига жисмонан куч ишлатгани билан боғлиқ можаро туфайли бир ярим йил ўйнай олмади. Якунда суд жиноий ишни ёпди ва Мэйсон футболга қайтди. Аммо «МЮ» Гринвудни шубҳали репутацияси туфайли жамоада қолдирмади ва «Хетафе»га ижарага бериб юборди. Испанияда ушбу англиялик ажойиб давра ўтказди: 16 ўйинда беш гол ва тўрт ассист. Энди Гринвудга испанларнинг икки гранди – «Барса» ва «Атлетико» қизиқиш билдирмоқда, деб хабар қилган Metro ва The Sun нашрлари. Каталонияликлар форвард учун 46 млн евро тўлашга тайёрлиги айтилмоқда.
Жейдон Санчо: «Манчестер Юнайтед» → «Боруссия» Д
«Манчестер Юнайтед» вингери Жейдон Санчо ижара асосида «Боруссия»га ўтади, дея хабар берган журналист Фабрицио Романо. 2021 йилда манкунианликлар ушбу инглиз футболчисини айнан дортмундликлар клубидан сотиб олганди. Ижара келишувига кўра «Боруссия» мавсумнинг қолган қисми учун «МЮ»га 3 млн евро тўлайди ва футболчининг маошини ҳам ўз зиммасига олади. Музокаралар жадаллик билан олиб борилмоқда, «Боруссия» вакиллари футболчи яқин вақтлар ичида жамоага қўшилишини истамоқда. Санчо 2023 йил август ойи охирида бош мураббий Эрик тен Ҳаг билан жанжаллашиб қолгач, «МЮ»нинг асосий таркибидан тушиб қолганди.
Рафаэл Варан: «Манчестер Юнайтед» → «Ал-Иттиҳод»/«Ан-Наср»
2018 йилги жаҳон чемпиони ва «Реал» сафида тўрт бор ЕЧЛ ғолибига айланган футболчи барибир «Манчестер Юнайтед» етакчисига айлана олмади. Ушбу француз футболчи ҳам бош мураббий Эрик тен Ҳаг билан келишмай қолган. Варан АПЛни тарк этишга қарши эмас. «Реал» ҳам марказий ҳимоячилари жароҳат олиб сафдан чиққани учун, Рафаэлни қайтариш вариантини кўриб чиққанди, аммо футболчининг ёши (31) ҳисобга олинса бу қайтиш амалга ошиши эҳтимоли кам. Журналист Бен Жейкобс Варанга Саудиянинг «Ал-Иттиҳод» ва «Ан-Наср» клублари қизиқаётгани ҳақида хабар берган. Икки жамоа сафида ҳам французнинг «Реал»даги собиқ жамоадошлари тўп сурмоқда: Карим Бензема ва Криштиану Роналду. Варан ким билан яна бир жамоада бўлади, буни вақт кўрсатади.
Конор Галлаҳер: «Челси» → «Тоттенҳэм»
Декабр ойи бошларида «Челси» тарбияланувчиси клубни тарк этиши мумкинлиги ҳақида хабарлар тарқалди ва бундай хабарлар ҳамон тингани йўқ. Журналист Бен Жейкобсга кўра, яримҳимоячи учун асосий даъвогар «Тоттенҳэм» бўлиб турибди. «Челси» Галлаҳерни қишда марказий ҳужумчи («Брентфорд»дан Айвен Тоуни ёки «Наполи»дан Виктор Осимҳен) олишни истаётгани ва шу билан бирга молиявий фейр-плей қоидаларини бузмаслик учун сотмоқчи, жамоа уни сўралган пул тўланса, ашаддий рақибларидан бирига сотишга ҳам тайёр. «Кўклар» 23 ёшли футболчисини 50-55 млн еврога баҳолаган, «шпорлар» эса 40 млн евро бермоқчи. Шу билан бирга, футболчининг ўзи ҳам, бош мураббий Маурисио Почеттино ҳам трансферга қарши - у жамоанинг мавсумнинг биринчи қисмидаги энг яхши футболчиларидан бири бўлди ва жамоа сардорларидан бирига айланди. Аммо барчаси раҳбариятга боғлиқ.
Леонардо Бонуччи: «Унион» → «Женоа»
«Ювентус» афсонаси Германияга 2023 йил ёзида йўл олганди. Берлиннинг «Унион» клуби Чемпионлар лигасида қатнашиши туфайли таркибини топ ҳимоячи билан кучайтирганди. Аммо Бонуччи якунда жамоани кучайтира олмади. «Унион» еврокубокда муваффақиятсизликка учраб, гуруҳда сўнгги ўринда қолиб кетди, Бундеслигада эса 10 ўйиндан ошиқ давом этган ғалабасиз серия қайд этиб, ҳозирда турнир жадвалида 15-ўринда бормоқда. Жорий мавсумда ҳимоячи барча турнирлар доирасида 10 ўйинда майдонга тушиб, битта гол урган. Журналист Николо Шира хабарига кўра, Бонуччи А Серияга қайтишга яқин. Унга асосий даъвогар – «Женоа» бўлиб турибди. Леонардо Италия миллий жамоаси билан Евро-2024 да иштирок этиш учун доимий ўйин амалиётига эга бўлишни истамоқда.
Калвин Филлипс: «Манчестер Сити» → «Нюкасл»
Англия миллий жамоаси таянч яримҳимоячиси 2022 йил ёзида 49 млн евро эвазига «Лидс»дан «Манчестер Сити»га ўтганди. Аммо Филлипс «шаҳарликлар»нинг асосий таркиби футболчисига айлана олмади ва фақат кубок ўйинларида туширилмоқда. The Telegraph хабарига кўра, «Нюкасл» уни ижарага олишни режалаштирмоқда. «Қарғалар» имкон қадар тезроқ келишувга эришмоқчи, чунки футболчига бошқа бир неча клуб ҳам даъвогар: «Ювентус», «ПСЖ», «Эвертон» ва «Кристал Пэлас». «Нюкасл» жароҳатлар туфайли кадрлар муаммосига дуч келган ва бу клубда инглиз футболчиси кўпроқ ўйин амалиётига эга бўлиши кафолатланган. Шундай экан, бу барча томонлар учун манфаатдор келишув бўлиши тайин.
Артём Довбик: «Жирона» → «Барселона»/«Атлетико»
«Барселона» ва «Атлетико» Мэйсон Гринвуддан ташқари яна бир футболчи учун рақобатлашмоқда. Жамоалар мавсумнинг сенсация жамоаси – «Жирона» форвардини кўз остига олишган. Журналист Акрам Конурга кўра, каталонияликлар ва мадридликлар Артём Довбикка қизиқиш билдирмоқда. 26 ёшли украиналик АПЛ клубларининг ҳам назарига тушган. Довбик жорий мавсумда «Жирона» сафида 18 ўйинда майдонга тушиб, 11 гол урган ва тўрт ассист муаллифига айланган. Каталонияликлар турнир жадвалида «Реал» билан бир хил очко тўплаган ҳолда қўшпешқадамлик қилмоқда. Шу билан бирга, Артём бу қишда клубини ўзгартира олмайди – у аллақачон бу мавсумда икки клуб учун майдонга тушиб қўйган (у август ойида «Днепр»дан трансфер қилинганди). Шу туфайли, қишда бирор клуб билан келишувга эришилса ҳам, у янги клубидаги дебютини фақат ёзда амалга ошириши мумкин бўлади.
Серу Гирасси: «Штутгарт» → «Бавария», «МЮ»
«Бавария» ҳужум чизиғида Ҳарри Кейнга шерик қидирмоқда. Журналист Кристиан Фалкнинг хабарига кўра, мюнхенликлар «Штутгарт» форварди Серу Гирассига қизиқмоқда, «Бавария» футболчини сотиб олишни истамоқда. Футболчи қишда олиб келиниши ҳам, ёзда олиб келиниши ҳам мумкин, мавсум якунида унинг трансфери учун 20 млн евролик банд ишга тушади. Жорий мавсумда 27 ёшли Серу Бундеслига доирасида 14 ўйинда майдонга тушиб, 17 гол урган ва бир голга ассистентлик қилган. «Штутгарт» ҳужумчиси — Германия чемпионатида иккинчи тўпурар бўлиб турибди. Ундан кўпроқ голни мюнхенликларнинг асосий ҳужумчиси Кейн урган (21). Шу билан бирга, ҳужумчига «МЮ»дан ҳам қизиқиш бор. Лекин инглизларда ҳужум чизиғи учун бошқа вариантлар ҳам бор – клубдагилар Гирассидан ташқари Тимо Вернер ва Томас Мюлер атрофидаги вазиятни ҳам кузатиб боришмоқда.
Жан-Клер Тодибо: «Ницца» → «Челси»/«Тоттенҳэм»/«Манчестер Юнайтед»
Аввалроқ «Барселона» аъзоси бўлган, сўнгги мавсумларда «Ницца» сафида ўйнаб келаётган ушбу ҳимоячи АПЛнинг топ-клублари назарига тушди. FootMercato хабарига кўра, «Челси», «Тоттенҳэм» ва «Манчестер Юнайтед» клублари раҳбарлари ушбу француз футболчисини олиб келишни истамоқда. «Кўклар» Тодибо бўйича музокараларга киришган, улар ҳимоячини январдаёқ қўлга киритмоқчи. «Тоттенҳэм» эса тўлақонли таклиф юбориб бўлган, футболчи ҳам «шпорлар» лойиҳасига қизиқиш билдирмоқда, аммо клублар ҳали келишувдан узоқда. «МЮ» вазиятни кузатишда давом этмоқда. Якунда Тодибо мавсумни қайси клубда давом эттириши ой охиригача аниқ бўлади.
“Замин” янгиликларини “Одноклассники”да кузатиб боринг
