Собиқ ҳужумчи Луи Саа Жейдон Санчони "Манчестер Юнайтед" тарихидаги энг омадсиз трансфер деб атади. Унинг фикрича, 73 миллион фунт стерлинг эвазига харид қилинган футболчининг ўзини кўрсата олмагани ҳамон сирлигича қолмоқда. Бу ҳақда Goal.com хабар беради.
Санчо 2021 йилда "Боруссия Дортмунд" клубидан катта умидлар билан сотиб олинган эди. Англиялик вингер Германияда Европанинг энг яхши ҳужумкор футболчиларидан бирига айланган бўлса-да, Премьер-лигада бу даражани такрорлай олмади.
У "Манчестер Юнайтед" сафида 83 та ўйинда майдонга тушиб, атиги 12 та гол урди. Собиқ мураббий Эрик тен Хаг билан очиқ зиддиятга борганидан сўнг, у "Боруссия Дортмунд", "Челси" ва "Астон Вилла" каби жамоаларга ижарага берилди.
Луи Саа Санчонинг ўз иқтидорини тўлиқ йўқотаётганини таъкидлади. Собиқ футболчи унинг "Олд Траффорд"да муваффақият қозонишини хоҳлаганини, аммо ҳозирги ҳолат ачинарли эканини айтиб ўтди.
Ҳозирда 26 ёшли вингер "Астон Вилла" сафида ижарада ўйнамоқда ва барча мусобақаларда 36 та ўйинда битта гол урди. Унинг "Манчестер Юнайтед" билан шартномаси ёзда якунланади ва клуб уни эркин агент сифатида қўйиб юбориши кутилмоқда.
“Zamin”ни Telegram'да ўқинг!
