Нодирбек Абдусатторов Superbet Poland 2024 турнирида қанча ишлаб топди?

Польша пойтахти Варшава шаҳрида бўлиб ўтган Superbet Poland 2024 турнири якунланди. Унда ўзбекистонлик гроссмейстер Нодирбек Абдусатторов ҳам иштирок этди.

Superbet Poland 2024 турнирининг соврин жамғармаси 175 минг долларни ташкил этди. Ҳозирги кунда дунёнинг биринчи шахматчиси бўлиб турган Магнус Карлсен мусобақада ғалаба қозонди. Магнус рапид ҳамда блиц баҳсларидан сўнг 26 очко тўплаб, мусобақа ғолиблиги ҳамда 40 минг долларга эга чиқди.

^{Фото: Grandchesstour}
Дунёнинг энг кучли шахматчилари қатнашган мусобақада Нодирбек Абдусатторов ҳам яхши иштирок этди. Рапид баҳсларини ўзбекистонлик шахматчи 8 очко билан 7-ўринда якунлади.

^{Фото: Chess}
18 турдан иборат блиц баҳслари ҳам қизиқарли ва ўта курашларга бой ўтди. Нодирбек Абдусатторов блиц баҳсларида 9.5 очко тўплашга муваффақ бўлди. Эътиборлиси, ўзбекистонлик шахматчи блиц баҳсларининг биринчисида Магнус Карлсендан устун келди. Норвегия вакили иккинчи баҳсда Нодирбек Абдусатторовни мағлуб этди.

Шу тариқа Нодирбек Абдусатторов мусобақани 17.5 очко тўплаб 6-ўринда якунлади. Шу билан бирга Ўзбекистоннинг биринчи рақамли шахматчиси 11минг АҚШ доллари пул мукофотига ҳам эга чиқди.

^{Фото: Grandchesstour}
Эслатиб ўтамиз, Нодирбек Абдусатторов Швециянинг Малмо шаҳрида бўлиб ўтган Tepe Sigeman 2024 турнирида ғолиб бўлган эди.

Grandchesstour маълумот беришича, Нодирбек Абдусатторов Руминиянинг Бухарест шаҳрида бўлиб ўтиши режалаштирган Superbet Romania 2024 баҳсларида иштирок этиш учун таклиф қилинган. Мусобақа 25 июндан 6 июлгача бўлиб ўтади. “Замин” янгиликларини “Одноклассники”да кузатиб боринг