“Рома”нинг ўйинини кучайтирган ва иккита голда иштирок этган Шомуродовнинг ўйини қандай баҳоланди?

Италия чемпионатида яна бош мураббий истеъфоси кузатилди. “Рома” бир ярим ой муқаддам иш бошлаган хорватиялик мураббий Иван Юрични истеъфога чиқарди.

Бунга А Сериянинг 12-туридан ўрин олган учрашув сабаб бўлди. “Бўрилар” ўз мухлислари кўз ўнгида “Болонья”дан 2:3 ҳисобида мағлубиятга учради.

Биз учун аҳамиятлиси, Элдор Шомуродов 58-дақиқада захирадан ўйинга қўшилиб, жамоасининг ўйинини кучайтира олди ва ҳар икки голда бевосита иштирок этди.

Италия футболини ёритиб келаётган vocegiallorossa.it портали “Рома” футболчиларининг учрашувдаги ҳаракатларини қуйидагича баҳолади.

Свилар 5: “Болонья”нинг учинчи голида дарвозабоннинг яққол хатоси бор.

Манчини 6: Бошида яхши ҳимояланди. Лекин римликлар дарвозасига киритилган биринчи голга у ҳам жавобгар. Иккинчи бўлимда Эл-Шааравига голли пас узатди.

Ндика 5,5: Ўйин аввалида рақиб ўйинчиси Сантьяго Кастрога қарши яхши ўйнади. Бироқ кейинчалик қийинчиликларга дуч келди.

Анжелино 5: Ҳужумларга яхши қўшилди. Римликларнинг иккинчи голида иштирок этди. Лекин ҳимояланишда етарли даражада ишончли ўйнамади.

Челик 4: Ўйинда умуман ўзини кўрсата олмади. 61-дақиқада ўрнини Далга бўшатиб берди.

Даль 6: Анча фаол ўйнади. Ишлари юриша бошлаганга ўхшайди.

Кристанте 4: Уринишларига қарамай, кутилган ўйинни намойиш қила олмаяпти. Бошқа жамоадошлари каби анча бўш ҳаракат қилди.

Коне 5: Унинг ҳаракатлари эвазига “Рома” биринч бўлимда гол уришга яқин келди. Сулени қулай позицияга чиқарди.

Эл-Шаарави 7: Биринчи бўлимда деярли кўриниш бергани йўқ. Лекин ўйиннинг иккинчи ярмида иккита гол билан жамоани жонлантира олди.

Суле 3: Яна бир ўта бўш ўйин. Олдинги чизиқда ҳеч нарса қила олмади ва 58-дақиқада ўрнини Элдор Шомуродовга бўшатиб берди.

Шомуродов 6: Жуда фаол ўйнади, енгил ҳаракатланди ва римликларнинг ҳар икки голида бевосита иштирок этди. Эл-Шааравининг иккинчи голига ассистент бўлди.

Пизилли 5,5: Ўйинни яхши бошлади, узоқ масофадан кучли зарба берди, лекин голдан дарак йўқ. 61-дақиқада ўрнини Бальданцига бўшатди.

Бальданци 5,5: Бор кучи билан ўйинни кучайтиришга ҳаракат қилди. Бироқ жамоасига етарли даражада ёрдам бера олмади.

Довбик 3: Майдонда умуман кўринмай қолди.

Юрич 3: “Рома” шу куни яна чўкди. Бу мутахассис жамоа ўйинчилари билан етарли даражада муносабат ўрната олмади. Мағлубиятлар унинг зиммасида. “Замин” янгиликларини “Одноклассники”да кузатиб боринг