Марко Станоевич: "Ўзимга қолса, фаолиятимни охиригача "Насаф"да қолган бўлардим"

Бу йил 37 ёшга тўладиган сербиялик ярим ҳимоячи Марко Станоевич янги мавсумни Самарқанднинг “Динамо” клубида бошлашидан хабарингиз бўлса керак. 5 йил давомида “Насаф” шарафини муносиб ҳимоя қилган легионер учун унинг Қаршидаги ҳаёти якунига етди.

Станоевич энди “Динамо” ўйинчиси сифатида янги мавсумга эътиборини қаратган. Фурсатдан фойдаланиб, Марко билан боғландик ва у сайтимиз учун “Насаф”ни тарк этиши ва “Динамо”га ўтиши ҳақида гапирди.

- Марко, “Насаф”даги беш йиллик фаолиятингиз кутганингиздан ҳам муваффақиятли ўтдими?
- “Насаф”да ўтган беш йил жуда яхши кечди. Ўтган вақт давомида кўплаб совринлар ва унвонга эга чиқдик. “Насаф”нинг асосий мақсади ҳам аслида шу. Клуб бундай ютуқларга чиройли ўйинлари орқали эришишни ёқтиради.

- “Насаф” сизга нима берди ёки сиз клубга нима бера олдингиз?
- Ўтган беш йил давомида мен билан елкама-елка тўп сурган барча жамоадошларимдан хурсандман. Улар билан худди ака-укалардек қадрдон бўлиб кетгандик.

- Айтинг-чи, жамоадан кетишни ўзингиз хоҳладингизми ёки...
- Албатта, йўқ. Бу клуб ва мураббий томонидан қабул қилинган қарор.

- Фаолиятингиз давомида энг кўп ўйнаган жамоангиз “Насаф” бўлди. У ерда 5 йил мобайнида сизни нима ушлаб турди?
- Албатта, беш йил ҳам ўзига яраша вақт ва мен ҳаммаси шундай ниҳоясига етишини хоҳламагандим. Ўзимга қолса, то фаолиятимнинг охиригача “Насаф”да жон деб қолган бўлардим.

- “Динамо”га ўтишингизга асосий сабаб нима?
- Ҳали ҳам футбол ўйнашни хоҳлайман. Шу боис “Динамо”дан қўнғироқ қилишганидан кейин ўйланиб ўтирмадим ва дарҳол розилик бердим.

- “Насаф”да бир қанча совринларни қўлга киритдингиз. “Динамо”да нима ютишни хоҳлайсиз?
- “Насаф”да ўтказган беш йил давомида Кубокни, чемпионатни ва Суперкубокни ютдим. “Динамо”да ҳам бундай муваффақиятли одимни давом эттиришни истайман. Бу клуб билан ҳам совринларга эга чиқишимизни жуда хоҳлайман.

“Замин” янгиликларини “Одноклассники”да кузатиб боринг