Абдуқодир Ҳусанов трансфери: дунёнинг энг зўр мураббийини қутқариш ўзбек йигити зиммасига тушмоқда

Шу кунларда ўзбекистонликлар ижтимоий тармоқда бир йигитни муҳокама қилмоқда. Абдуқодир Ҳусанов. Футболга қизиқадиган-қизиқмайдиган одамлар тилида шу йигит. Чунки бу футболчи мисолида ўзбек футболида тарихий воқеа содир бўлиш арафасида. Ҳусанов 40 миллион евро эвазига дунёнинг энг кучли клубларидан бири «Манчестер Сити»га ўтмоқда, деб ёзмоқда Kun.uz нашри.

Ҳимоячининг ўғли

Ўзбек футболига қизиқадиганлар билишади, «Металлург»да Ҳикмат Ҳошимов деган марказий ҳимоячи бўларди. 4-рақамли ҳимоячи узоқ йиллар Бекобод жамоасида сардорлик қилган. Абдуқодир мана шу футболчининг ўғли. Ўғил болалар учун ҳаётидаги илк қаҳрамони шубҳасиз отасиз бўлади. Катта бўлсам дадамга ўхшайман, дейди кўп болалар. Абдуқодир ҳам дадасининг ўйинларини ҳавас билан томоша қилган, мен ҳам зўр марказий ҳимоячи бўламан, деб дилига тугиб қўйган ва бу орзусига етишиш учун меҳнат қилган. Меҳнат ва иштиёқ бирлашганда эса натижа, албатта, зўр бўлади. Абдуқодир бугун дунёдаги энг зўр ҳимоячилардан бири. Бу гапни энди ҳеч иккиланмай айтаверсак бўлади. У энг зўрлардан бўлмаганида кўпчилик футбол тарихидаги энг кучли мураббий деб атайдиган Пеп Гвардиола уни ҳар қанақасига сотиб олишга топшириқ бермасди.

Эртакнамо йўл

Абдуқодирнинг босиб ўтган йўли шунчаки ҳайратланарли. Одатда футболчилар ўз мамлакатида бирор клубда зўр ўйин кўрсатади, кейин босқичма-босқич кучлироқ чемпионатларга ўтади. Лекин Ҳусановнинг фаолияти қийинчиликлар билан бошланади. «Бунёдкор» клуби тарбияланувчиси бўлган ҳимоячига негадир қалдирғочлар бош жамоасида ишонч билдиришмайди. Шу ўринда Бунёдкорнинг ўша даврдаги мураббийларига ҳайрон қолмай илож йўқ. Улар қандай қилиб шундай кучли футболчини текинга Беларус клубига бериб юборганини тушуниш қийин. Ахир Абдуқодир ёшлар жамоасида вақтидаёқ топ ҳимоячи экани маълум эди.

Лекин Ҳусановимиз эртароқ Беларусга кетгани ҳам бир томондан яхши бўлган. Тўғри, Беларус чемпионати Ўзбекистондан кучли эмас, лекин футболчининг агентлари у Ўзбекистон клубида асосий таркибда ўйнашини кутишса кеч бўлишини тушуниб етган. Бунинг устига Абдуқодир Беларусда кўп қолиб кетмади. «Энергетик БГУ» деган клубда бир йил ўйнаган Ҳусановни агентлари Франциянинг «Ланс» клубига таклиф қилади. Французлар эса «Бунёдкор» мураббийларидан фарқли ўлароқ Ҳусанов катта футболчи эканини тезда сезиб, унинг учун 100 минг евронинг баҳридан ўтишади.

Аввалига Ҳусанов «Ланс»да захирадан майдонга тушиб юрди, лекин иккинчи мавсумида у жамоанинг асосий ҳимоячисига айланди. Серхио Рамос усулидаги ўйинлари сабаб Европа грандлари унга ошиқ бўла бошлашди. Ишонинг, ҳозир Европа футболида бунақа стилда ўйнайдиган футболчилар камайиб кетган. Уни фалон футболчига ўхшайди деб ҳам айтолмайсиз, чунки бундай футболчининг ўзи йўқ. Ҳусанов ўйинида Серхио Рамоснинг агрессивлигини, Нголо Кантенинг тоза подкатларини, Виржил ван Дейкнинг ҳаводаги курашларини кўришингиз мумкин. Табиийки, топ клублар бундай мегаистеъдодни эътибордан четда қолдирмайди. Ҳусанов учун «Сити» билан кимсан «Реал» курашганди ахир, тасаввур қиляпсизми?

Пеп нега уни танлади?

Биласиз, «Манчестер Сити» ҳозир қийин даврни бошдан кечирмоқда. Гвардиола Ситини Англия футболининг чинакам гигантига айлантирди, ҳатто Чемпионлар Лигасини ютди. АПЛда совринлар сони бўйича фақат сэр Алекс Фергюсондан ортда қолмоқда. Охирги йилларда инглиз клублари Премиер Лигада иккинчи ўрин учун курашадиган бўлиб қолганди. Аммо бу мавсумда Пепнинг жамоасида муаммолар кузатиляпти, барчаси Олтин тўп соҳиби Родри жароҳат олиб, сафдан чиққанидан кейин бошланди. Албатта, бу ягона сабаб эмас, Де Брюйне ва Уокер каби футболчилар қарияпти, Грилиш ва Фоден ўйинида пасайиш кузатилди, бир йил олдин 117 миллион фунтга сотиб олинган Грилиш 2024 йилда бирорта гол ҳам урмади. Родри сафдан чиққани эса барчасидан ошиб тушди.

Шу учун Гвардиола янги футболчилар олиш зарур эканини айтди. Абдуқодир Ҳусанов марказий ҳимояда жиддий рақобатга дуч келади. У ерда Ёшко Гвардиола, Рубен Диаш, Натан Аке каби жиддий футболчилар бор. Лекин Ҳусанов бунақа катта суммага сотиб олинганига қараганда захирада ўтирмаслиги аниқ. Баъзи экспертлар Гвардиола уни Родрининг ўрнида синаб кўриши мумкин деган фикрни ҳам илгари сурмоқда. Бўлиши мумкин, Гвардиола экспериментларни яхши кўради. Ахир Пеп бўйи 170 см бўлган Хавиер Маскеранони марказий ҳимояда ўйнатган мураббий.

Лекин Ҳусанов асосан марказий ҳужумчиларни тўхтатиши билан фойдали экани инобатга олинса, уни бошқа позицияга қўйишмаса керак. АПЛдаги марказий ҳимоячилар жисмоний жиҳатдан жуда кучли, уларни тўхтатиш учун бизнинг Ҳусановга ўхшаган жисмоний бақувват, ҳавода зўр курашадиган, тўп ҳужумчига тушиши билан унга ёпишадиган ҳимоячи керак. Машғулотларда бу ишни Ҳоланд билан бажариб кўриш имкони бор.

Биласиз, Гвардиола жамоасида ҳамма тўп узатиш борасида маҳоратли бўлиши керак, ҳатто дарвозабон ҳам. Абдуқодирнинг узоқ масофаларга узатмаси аниқ экани эса унинг «Сити»га мослашишини тезлаштиради.

Хуллас, ўзбек футболида мана шундай катта воқелик содир бўлмоқда. Абдуқодирнинг рекордлари ҳақида трансфер расман эълон қилингач яна алоҳида гаплашамиз. Ҳозир эса барча футбол мухлисларини табриклайман. Ахир бир эсланг, бизнинг ҳам бирор футболчимиз Англиянинг ўртамиёна жамоасида бўлса ҳам ўйнаса, унга мухлислик қилсак, деб юрардик. Ҳозир эса бизнинг футболчимиз Британиянинг энг зўр жамоаси сафига ўтмоқда. «Юнайтед»нинг ўзбекистонлик мухлисларидан эса узр сўраймиз. Бугундан Манчестернинг ранги биз учун кўк, қизил эмас.

“Замин” янгиликларини “Telegram”да кузатиб боринг