“Манчестер Сити” Абдуқодир Ҳусанов трансферига қандай муносабат билдирди?

Ниҳоят, кўпчилик кутган трансфер – “Манчестер Сити” Ўзбекистон миллий терма жамоаси марказий ҳимоячиси Абдуқодир Ҳусановни ўз таркибига қўшиб олган расман эълон қилинди.

Манчестерликлар директори Чики Бегиристайн ўзбекистонлик футболчининг ўзи ва бу трансфернинг аҳамияти ҳақида муносабат билдирди.

- Абдуқодир Ҳусанов сафимизга қўшилганидан беҳад мамнун ва хурсандмиз. Ва биз бу футболчининг жамоага қўшадиган ҳиссаси ҳақида ўйлаб ҳаяжонланяпмиз.

Абдуқодир ёш ҳимоячи бўлишига қарамай, жуда ақлли, шунингдек, жисмонан бақувват, шиддатли ва ўта тезкор.

Бош мураббий Хосеп Гвардиола билан ишлаш уни янада кучли қилади, ўйинчининг ўзи ҳам ўсишда давом этиш учун қатъият билан истагини билдирди. Бу ҳақиқатан ҳам жуда эътиборли трансфер, чунки биз Европадаги энг зўр жамоалардан бири сифатида мавқеимизни сақлаб қолиш учун янада кўпроқ ўсишга ҳаракат қиляпмиз.

“Манчестер Сити”даги ҳамма Абдуқодирни клубда кўришдан жуда мамнун, - деди тажрибали мутахассис Чики Бегиристайн.

Таъкидлаш жоизки, Абдуқодир Ҳусанов футболнинг илк сир-асрорларини “Бунёдкор” академиясида ўрганган. Кейинчалик Беларусга кўчиб ўтиб, ёши профессионал шартнома тузишга етмагани боис, “Энергетик-БГУ” сафида шунчаки шуғулланиб юрди.

Кейин 2022-2023 йиллар давомида ушбу мамлакат олий лигасида ўйнаб, ўзини кўрсатди. Ҳамюртимиз “Энергетик-БГУ” сафида жами 37 та учрашувда иштирок этиб, ўз ҳисобига тўрттадан гол ва ассист ҳам ёздириб қўйган.

Абдуқодир Ҳусанов хориж клублари эътиборига асосан Ўзбекистон ёшлар терма жамоаси сафида Осиё кубоги ва жаҳон чемпионатларидаги иштироки орқали тушди. “Ланс” 2023 йилнинг ёзида ҳали ҳеч ким танимайдиган футболчимизни 100 минг евро эвазига трансфер қилди.

Бир ярим йилда бу трансфер ўзини мутлақ оқлади. “Манчестер Сити” ўндан зиёд даъвогарларни ортда қолдириш учун “Ланс” ҳимоячисини 50 миллион еврога трансфер қилишга қарор қилди.

Абдуқодир Ҳусанов “шаҳарликлар” билан 2029 йилнинг ёзигача давом этадиган шартнома имзолаган. Томонларда ўзаро келишган ҳолда ҳамкорликни яна бир йилга узайтириш имкони бор.

Энди ўзбекистонлик футбол ишқибозлари ва Абдуқодир Ҳусановга мухлислик қилаётган дунёнинг бир неча мамлакатларидаги футбол жамоатчилиги ўзбек футболчисининг “Манчестер Сити”даги дебютини кутмоқда. “Замин” янгиликларини “Telegram”да кузатиб боринг