Абдуқодир Ҳусанов туфайли ўзбек футболининг обрўси ошди!

Абдуқодир Ҳусановнинг “Манчестер Сити”га ўтиши ўзбек футболи тарихидаги энг ёрқин воқеалардан бўлиш баробарида Европада ҳам катта акс садо бермоқда.

Кейинги пайтда 20 ёшли ўзбек футболчисининг катта трансфер суммаси эвазига Англиянинг амалдаги чемпиони ва замонамизнинг энг қудратли клубларидан ҳисобланган “Манчестер Сити”га ўтганига хориж мамлакатларидан ҳам муносабат бўляпти.

Хусусан, арманистонлик машҳур футбол агенти Ншан Депелян Абдуқодир Ҳусановнинг “Манчестер Сити”га ўтгани мамлакат футболининг обрўсини кўтариши, ёшлар учун ҳақиқий ўрнак бўлишини алоҳида таъкидлади.

- “Манчестер Сити”га катта маблағ эвазига трансфер қилинган Абдуқодир Ҳусанов кўпчиликка ўрнак бўла олади. Табиийки, бу трансфер собиқ иттифоқ ҳудудидаги футболчилар оқими учун Европага йўл очади, деб бўлмайди.

Лекин айрим шундай ҳолатлар футболда кўп кузатилади. Бунақаси ҳар доим бўлган.

Ҳусанов – собиқ иттифоқ ҳудудидан етишиб чиқаётган футболчилар учун ёрқин намуна ҳисобланади. Албатта, биз бу ўйинчига мухлислик қиламиз. Ўзбек футболини ҳурмат қиламиз, бу мамлакат терма жамоаси ўйинларини кузатиб борамиз, - деди Ншан Депелян.

Москванинг “Спартак” жамоаси собиқ ҳужумчиси Александр Прудников ҳам легионеримизнинг Англия Премьер-лигасига кўчиб ўтганига муносабат билдирди.

- "Бу трансфер орқали Россия Премьер-лигаси клублари спорт директорларига катта савол туғиляпти. Баъзан ёнгинамизда ноёб иқтидор эгалари бўй кўрсатади, лекин биз уни пайқамай қоламиз.

Ҳусановдан ташқари, ҳозир ҳамма Хвича Кварацхелия ҳақида ҳам гапиряпти. Қизиғи, Россия Премьер-лигасининг айрим клублари вақтида бу футболчини ҳам рад этишган эди. Бунинг ўзига хос сабаблари бўлиши мумкин, лекин клубларимизнинг аксарият мутасаддилари истеъдодларга умуман эътибор қаратмаяпти", - деди Александр Прудников.

Эслатиб ўтамиз, Абдуқодир Ҳусанов футболнинг илк сир-асрорларини “Бунёдкор” академиясида ўрганган. Кейинчалик Беларусга кўчиб ўтиб, ёши профессионал шартнома тузишга етмагани боис, “Энергетик-БГУ” сафида шунчаки шуғулланиб юрди.

Кейин 2022-2023 йиллар давомида ушбу мамлакат олий лигасида ўйнаб, ўзини кўрсатди.

Абдуқодир Ҳусанов хориж клублари эътиборига Ўзбекистон ёшлар терма жамоаси сафида Осиё кубоги ва жаҳон чемпионатларидаги иштироки орқали тушди. “Ланс” 2023 йилнинг ёзида ҳали ҳеч ким танимайдиган футболчимизни 100 минг евро эвазига трансфер қилди.

Бир ярим йилда бу трансфер ўзини мутлақ оқлади. “Манчестер Сити” ўндан зиёд даъвогарларни ортда қолдириш учун “Ланс” ҳимоячисини 50 миллион еврога трансфер қилишга қарор қилди.

Маълумотларга қараганда, Абдуқодир Ҳусанов “шаҳарликлар” билан 2029 йилнинг ёзигача давом этадиган шартнома имзолаган. Томонлар ўзаро келишган ҳолда ҳамкорликни яна бир йилга узайтириши мумкин. “Замин” янгиликларини “Telegram”да кузатиб боринг