“Мастерс” гуруҳи етакчиси Нодирбек Абдусатторов катта интервью берди

Нидерландиянинг Вейк-ан-Зее шаҳрида шахмат бўйича давом этаётган “Tata Steel Chess-2025” турниридаги ўтказилган 5-тур ўйинлари “Мастерc” гуруҳида ғолиблик учун асосий даъвогарлардан бири бўлган Нодирбек Абдусатторов учун ҳар жиҳатдан омадли кечди.

Ҳамюртимиз қора доналарда Нидерландия вакили Йорден ван Форестга қарши дона сурди. Шиддатли кечган ўйин кутилганидек Нодирбекнинг устунлигида ўтди ва 47-юриш ҳолатида Йорден ван Форест ютқазганини тан олди. Бу Нодирбек Абдусатторовнинг 4 очко билан қўшимча кўрсаткичларга кўра, “Мастерс” гуруҳи етакчисига айланишини таъминлади. Ушбу ғалабадан сўнг вакилимиз ўз фикрларини билдириб ўтди.

- Нодирбек, Жорден Ван Фореест устидан қозонилган ғалаба билан табриклайман! Биринчи дам олиш кунидан олдин 5-турдан кейин 4 очко тўпладингиз — эҳтимол, натижадан мамнунсиз?
- Раҳмат! Ҳа, жуда хурсандман. Ҳозирча ҳаммаси яхши кетяпти, бугунги ғалабадан кейин эса янада мамнунман. Энди Гукешга қарши бўладиган кейинги партияни сабрсизлик билан кутяпман.

- Кейинги рақибингиз — янги жаҳон чемпиони. Лекин аввал бугунги партия ҳақида гаплашсак. Аввалги интервюларда Вейк-ан-Зееда ўйинларингиз яхши чиқаётгани ҳақида гаплашгандик, аммо икки йил аввал охирги турда айнан Жорден ғалабали сериянгизни тўхтатган эди. Ўтган йили реваншни олдингиз, бугун ҳам шу анъанани давом эттирдингиз.
- Ҳа, партия осон бўлмади. Мен Каро-Канн ҳимоясини ўйнадим, лекин ундан c4 юришини кутмаган эдим. Шунинг учун тахтада эски таҳлилларимни эслашга тўғри келди.

- Агар аниқ тайёргарликни эслай олмасангиз, қандай йўл тутасиз?
- Мен, одатда, тез ўйнашга ҳаракат қиламан, ҳатто дебютни пухта билмасам ҳам. Шундай тезлик рақибга босим ўтказишда ёрдам беради.

- Партия қачон мураккаблашди?
- Калит лаҳза унинг б5 юриши бўлди. Мен унинг режасини тушунишга ҳаракат қилдим. Масалан, c5 юриши д5 катагини заифлаштириши мумкин эди, шу сабабли хавфли бўлиши мумкин. Аммо менимча, у энг тўғри йўлни танламади.

- Партияда мураккаб вазиятлар бўлдими?
- Ҳа, масалан, фарзин а2 юришидан кейин мен узоқ вариантларни, жумладан, қурбонликлар ва мураккаб манёврларни ҳам ҳисобладим. Яхшиямки, ҳаммаси мен хоҳлагандек натижа берди.

- Шундай узоқ ҳисоб-китоблар қилаётганингизда ўзингизни қандай ҳис қиласиз?
- Мен ҳар доим чиройли ва узоқ комбинацияларни топишни яхши кўрганман. Бу партия давомида менга куч ва энергия беради.

- Рақибингиз узоқ ўйлаётганида, сиз ўрнингиздан турмай тахта ёнида қолдингиз. Сиз аллақачон ҳамма нарсани ҳисоблаб бўлгандингизми?
- Ҳа, мен позицияда нималар бўлаётганини аниқ билардим ва ҳисоб-китобларимга ишончим комил эди.

- Бир турдан кейин сиз Гукешга қарши ўйнайсиз. Жаҳон чемпионига қарши ўйнаш қандай ҳис?
- Бу ҳар доим алоҳида воқеа. Биз аввал ҳам бир неча марта ўзаро тўқнаш келганмиз. Унинг жаҳон чемпионлиги учун бўлган матчи жуда илҳомлантирувчи бўлди. Мен унинг учун хурсандман ва ўзаро ўйинимизни кутяпман.

- Жаҳон чемпионлиги матчида унга мухлислик қилганмидингиз?
- Ҳа, мен уни кичик фаворит, деб ўйлагандим. Охир-оқибат, унинг асаби Дингга нисбатан кучлироқ бўлиб чиқди.

- Шундай матчларни мухлис сифатида кузатиш қандай?
- Мен матчни тўлиқ томоша қила олмадим, чунки Қатар Мастерс турнирида ўйнаётган эдим. Жаҳон чемпионлигининг якуний партияси билан менинг турниримнинг сўнгги тури бир вақтда бошланди. Ўзимнинг партиям тугагач, дарҳол Гукешнинг ғалабасини томоша қилдим. Матч жуда юқори савияда бўлиб ўтди.

- Эртага дам олиш куни. Режалар борми?
- Ҳа, мен Амстердамга боришни, яхши овқатланишни ва бироз дам олишни режалаштирганман. Тайёрланиш ишларини кейинроқ давом эттираман". “Замин” янгиликларини “Telegram”да кузатиб боринг