09:11 / 07.02.2025

Абдуқодир Ҳусанов: Беларусдан “Манчестер Сити”гача бўлган йўл

Беларусь футболи вакиллари Абдуқодир Ҳусановнинг “Манчестер Сити”га ўтишини фахр билан тилга олиб, унинг профессионал фаолиятини айнан Беларусь олий лигасида бошлаганини эътироф этмоқда.

Беларусь орқали Европага йўл

Ўзбек футболчиси 2022 йили “Энергетик-БГУ” билан биринчи профессионал шартномасини имзолаган ва бир йил ўтиб, Франциянинг ўша пайтдаги вице-чемпиони “Ланс” жамоасига кўчиб ўтган эди. Бу трансфер Беларусь футболи тарихида маҳаллий жамоанинг Европанинг “топ-5” лигасига амалга оширган илк йирик сотуви сифатида қайд этилди.

Беларуслик футболчи ўзбек футболи ҳақида

Ҳозирда Беларуснинг “Витебск” клуби шарафини ҳимоя қилаётган Ярослав Макушинский ўз вақтида Ўзбекистон чемпионатида “Бухоро” жамоаси сафида ҳаракат қилган ва “Энергетик-БГУ”да Абдуқодир Ҳусанов билан бирга ўйнаган. У интервьюсида шундай дейди:

➤ “Ўзбекистон чемпионатининг биринчи лигаси ҳам кучли мусобақа ҳисобланади. Ташкилотчилик юксак даражада, мухлислар сони ҳам кўп. Улар ўз жамоасини фаол қўллаб-қувватлайди.”

➤ “Мен тўп сурган ‘Бухоро’ клуби Беларусь олий лигасида бешинчи ўрин учун курашиши мумкин эди. Чунки у ерда рақобат жуда кучли ва жамоалар даражаси бир-бирига жуда яқин.”

Абдуқодир Ҳусанов ҳақида фикрлар

Макушинский Ҳусановнинг меҳнаткашлиги ва интизоми ҳақида ҳам тўхталиб ўтди:

“Абдуқодир ‘Энергетик-БГУ’га келган дастлабки пайтларда асосий таркибга кира олмасди, лекин жуда қаттиқ меҳнат қиларди. Машғулотларда юз фоиз кучини сарфларди. У нафақат иқтидорли футболчи, балки камтарин инсон ҳам эди.”

Европа грандлари Ҳусанов учун курашди

Абдуқодир Ҳусанов футбол сир-асрорларини “Бунёдкор” академиясида ўрганган. Бироқ у ўсмирлигидаоқ Беларусга йўл олган ва 18 ёшида “Энергетик-БГУ” билан профессионал шартнома тузган.

Фаолиятидаги тез ривожланиш натижасида у “Ланс” орқали Европа клубларининг эътиборига тушди. Унинг трансфери учун “Манчестер Сити” ва “Реал Мадрид” ўртасида жиддий рақобат юз берди. Охир-оқибат Англия чемпионлари ғолиб чиқиб, унинг учун 50 миллион евро тўлашга келишиб олди.

Абдуқодир Ҳусанов бугунги кунда Франция ва Англия чемпионатларининг олий дивизионида ўйнаган биринчи ва ҳозирча ягона ўзбекистонлик футболчи ҳисобланади.