Ҳусановнинг устози “Реал”нинг энг зўр ўйинчисини олишни кўзлаяпти

Англиянинг амалдаги чемпиони “Манчестер Сити”га Европа Чемпионлар лигаси плей-офф босқичи ўтиш ўйинида қитъадаги энг нуфузли мусобақа ғолиби “Реал” рўбарў келадиган бўлган.

Бу икки буюк клуб бош соврин учун курашни давом эттирадиган жамоа номини 11 ва 19 февраль кунлари бўладиган иккита учрашувда аниқлаб олади.

Ўзбекистонлик футбол ишқибозлари учун аҳамиятли томони шундаки, “шаҳарликлар” Чемпионлар лигаси қайдномасига Абдуқодир Ҳусановни ҳам киритди. Янги жамоаси сафида иккинчи учрашувдаёқ дебют голини урган легионеримиз мураббийлар штаби ва жамоадошлари ишончини оқлай бошлади.

Энди Абдуқодир Ҳусанов халқаро мусобақа доирасида қишда ўзига харидор бўлган “Реал Мадрид”га қарши майдонга тушиши кутилмоқда.

Ўз навбатида, “шаҳарликлар” устози Хосеп Гвардиола бўлажак икки учрашувда ўзи олишни кўзлаётган Жуд Беллингемнинг имкониятларини бевосита кузатиш имконига эга бўлади. Бу ҳақда Испаниянинг нуфузли манбаларидан бири fichajes.net сайти маълум қилди.

- Карло Анчелотти ва унинг шогирдларини қишда таркибини кучайтириш учун 200 миллион евродан зиёд маблағ сарфлаган ва энди мадридликлар етакчиси Жуд Беллингемга кўз тикаётган “Манчестер Сити” билан аёвсиз тўқнашув кутиб турибди.

Пеп Гвардиола келаси мавсумда Кевин де Брюйненинг ўрнини эгаллаши керак бўлган Жуд Беллингемни қўлга киритиш учун янги ҳаракатларни амалга ошира бошлади. Испаниялик мураббий аввал ҳам бир неча маротаба Беллингемнинг иқтидори ва салоҳиятини юқори баҳолаб, яқин келажакда у билан ишлаш орзуси борлигини маълум қилган эди.

“Манчестер Сити” раҳбарияти ва мураббийлари штаби Кевин де Брюйненинг ёши ўтиб қолаётгани, жисмоний муаммолари кўплиги, жароҳатларга мойиллиги ортиб бораётгани ва тикланиши қийин кечаётганини инобатга олиб, шартномаси якунланиши билан бошқа клубларга кетишига қаршилик қилмайдиган бўлган.

- Кевин де Брюйне, шубҳасиз, биз учун асосий ўйинчилардан, лекин ҳамкорликнинг давом этиши жуда кўп омилларга боғлиқ бўлади, - деган эди Хосеп Гвардиола.

Аксинча, “шаҳарликлар” бир неча йилдан бери жамоада ўйнаб келаётган ўз юлдузлари ўрнига истеъдодли, тезкор, курашувчан янги авлод вакилларини олиб келиш сиёсатини бошлаб юборди. Ана шу режа асосида январда жамоага Абдуқодир Ҳусанов, Витор Рейс, Умар Мармуш ва Нико Гонсалес олиб келинди.

Жуд Беллингемнинг ўзи Мадридга узоқ йиллар давомида ўйнаш учун келганди. Бироқ ёзда жамоага Килиан Мбаппе қўшилганидан кейин “Реал”даги дебют мавсумида жамоанинг асосий фигурасига айланган англиялик футболчи ўз-ўзидан иккинчи планга ўтди. Бу ҳолат Беллингемга ёқмаганини жорий мавсумнинг биринчи қисмида бир неча бор жамоадаги вазиятдан норози бўлганидан билиб олиш мумкин.

Трансферлар бўйича экспертлар ҳам Жуд Беллингемни “Реал”дан олиб кетиш осон бўлмаслигини таъкидламоқда. Чунки “Қироллик клуби” ҳеч бир жиҳатдан “Манчестер Сити”дан қолишмайди. Аммо футбол бизнесга айланиб кетган бугунги кунда олдиндан бирон нима, деб бўлмайди. Бугун катта маблағ билан имконсиз ишларни уддалаш эҳтимоли катта. “Манчестер Сити”да эса, пул санаш бўйича ҳеч қандай муаммо, камчилик, етишмовчилик бўлмайди... “Замин” янгиликларини “Telegram”да кузатиб боринг