Аббосбек Файзуллаев хавотирга соляпти!

Россия Премьер-лигасидаги легионерларимиз орасида энг ёрқин ўйин кўрсатаётгани, шубҳасиз, Аббосбек Файзуллаев ҳисобланади.

21 ёшли ҳужумкор футболчимиз том маънода ЦСКАнинг етакчисига айланиб қолган. “Армиячилар”нинг аксарият ҳужумлари айнан ўзбек легионери орқали ташкил этилади. Аббоснинг ўзи турли позицияларда ўйнай оладиган универсал футболчилар тоифасига киради.

ЦСКА бош мураббийи Марко Николич қишки танаффусдан фойдаланиб, жамоанинг ўйин услубини ўзгартирди. Қишки йиғинларда “армиячилар” янги схемада тўп тепди. Сербиялик мутахассис Аббосбек Файзуллаевнинг позициясини ўзгартирди.

Россия футболи мутахассислари Николичнинг бу қарорига турлича муносабат билдирмоқда. Хусусан, таниқли мураббий Игорь Шалимов бу борада ўз фикр-мулоҳазаларини маълум қилди.

- ЦСКА янги ўйин схемасига ўтганидан кейин жамоа ҳаракатларида катта ўсиш кўзга ташлангани йўқ. Бу услуб топ-жамоаларга қарши учрашувларда самара келтириши мумкин. Бунда рақибга кенгроқ майдон берилади, “армиячилар” эса, пайт пойлаб тезкор қарши ҳужумга ўтиб кетади. Бу вазиятда гол уриш имконияти ошади.

Ўртамиёна ва аутсайдер жамоалар билан ўйинда ЦСКА ҳимоя чизиғини позицион ҳужум ёрдамида ёриб ўтиши талаб этилади. “Армиячилар” ўйинида айнан мана шу услуб яхши ишлаб чиқилмаган.

Миралем Пьянич келганидан бери ўйинида ўсиш бўлгани йўқ, кузда қандай ҳаракат қилган бўлса, ҳозир ҳам шундай. Балки унга яна вақт керакдир.

Кўпчилик қатори мени янги схемада Аббосбек Файзуллаев ўзини жуда қулай ҳис қила олмаётгани хавотирга солмоқда. Аббоснинг ўзига бўлган ишончи аввалгидек эмас, майдонда қабул қилаётган қарорлари ҳам, - деди Игорь Шалимов.

Таъкидлаш жоизки, аввалроқ Аббосбек Файзуллаевнинг ўзи ҳам майдондаги жойи ўзгаргани, янги позицияда ўйнашга кўникиши кераклигини айтганди.

- Қишки ўқув-машғулот йиғинлари доим қийин ўтади, чунки юкламалар кўп, машғулотлар жуда мураккаб. Биз янги ўйин схемасига ўтдик ва ҳозир уни ўзлаштиришга эътибор қаратганмиз, унга кўникиш учун бироз вақт талаб этилади. Янги схема бўйича биз тўпга кўпроқ эгалик қиламиз.

Ўзимнинг позициям ўзгарди. Илгари мен бу даражада майдон ичкарисига тушиб, ҳужум қилмаганман. Бу усулда бир Ўзбекистон терма жамоасида ўйнаб кўрган эдим.

Ўйинда боримни беришга ҳаракат қиламан, айни пайтда мураббий мени 8-рақам позициясида ўйнатяпти. Болалигимдан 10-рақам ўрнида ўйнаб келганман ва бу жойда ўзимни анча қулай ҳис қилардим. Ҳозир ўзимнинг янги қирраларимни кашф қиляпман, дейишим мумкин. Вақт берилса, ҳужум схемасида бу позицияда ҳам самарали ўйнашни ўрганиб оламан, - деган эди Аббосбек Файзуллаев.

Эслатиб ўтамиз, Аббосбек Файзуллаев 2023 йилнинг август ойида “Пахтакор”дан ЦСКАга кўчиб ўтди. Шундан бери “армиячилар” сафида барча турнирларда 55 маротаба майдонга тушиб, саккизта гол ва 20 та ассист муаллифи бўлди. “Замин” янгиликларини “Telegram”да кузатиб боринг