УЕФАнинг энг нуфузли турнири – Чемпионлар лигаси бу мавсум янги форматда ўтказилмоқда. Умумий босқичда иштирок этган 36 та жамоадан 24 таси плей-оффга йўл олган эди. Улардан кучли саккизликдан жой олган жамоалар нимчорак финалга тўғридан тўғри чиққан. Қолган 16 та жамоа ўтиш ўйинларида қатнашишига тўғри келди.
Ушбу турнирда иштирок этаётган ягона ўзбек футболчиси – Абдуқодир Ҳусановнинг жамоаси “Манчестер Сити” ўтиш ўйинларида “Реал”га рўбарў келди. Ўз майдонида амалдаги ғолибга 2:3 ҳисобида ютқазган Хосеп Гвардиола шогирдлари Мадриддаги жавоб баҳсида бу гал 1:3 ҳисобида енгилди.
Биз учун аҳамиятли томони шундаки, Абдуқодир Ҳусанов илк бор Европа Чемпионлар лигасининг плей-офф босқичида ўйнади. Бу 20 ёшли ҳимоячимизнинг “Манчестер Сити” сафида халқаро миқёсдаги дебюти бўлди.
Бундан ташқари, Абдуқодир ажойиб натижа эгасига айланди. Ҳусанов Чемпионлар лигаси плей-офф босқичида “Реал”га қарши “Сантьяго Бернабеу” стадионидаги ўйинда дебютини ўтказган иккинчи энг ёш ўйинчи бўлди. Беллашув ўтказилган санада легионеримиз 20 ёшу 356 кунлик эди.
Аввалги рекорд 2014 йили ўрнатилган бўлиб, “Шальке” футболчиси Каан Айхан 19 ёшу 128 кунлигида “Реал”нинг уй стадионида майдонга тушган.
Таъкидлаш жоизки, Абдуқодир Ҳусанов учрашув давомида мухлислар кутганидек Винисиус Жуниорга гол уриш имконини бермаган бўлса-да, “шаҳарликлар”нинг бутун ҳимоя чизиғи Килиан Мбаппени тўхтата олмади.
Франциялик юлдуз учрашувда учта тўп киритиб, айни пайтда жуда кучли спорт формасида эканини яна бир карра исботлаб қўйди.
Килиан Мбаппе Хосеп Гвардиола бошқарувидаги жамоаларга Чемпионлар лигаси доирасида гол уриш борасида Лионель Мессининг рекордини такрорлади. Аргентиналик жаҳон чемпиони Европада ўйнаб юрган даврларда қитъанинг энг нуфузли халқаро турнирида испаниялик мутахассис шогирдларини етти маротаба уялтириб кетганди. Хет-трикдан кейин Мбаппе ҳам Гвардиола жамоаларига урган голлари сонини еттитага етказиб олди.
Хосеп Гвардиоланинг ўзи ҳам ҳозир “Реал” унинг жамоасидан кучли эканини тан олди.
- “Реал Мадрид” – ажойиб клуб ва кейинги босқичга ўтишга муносиб жамоа. Биз нимчорак финалга чиқиш учун бу жамоага етарли даражада қаршилик кўрсата олмадик. Бу аччиқ тажриба ва биз буни қабул қилиб, келаси мавсум яна Чемпионлар лигасида иштирок этиш ҳуқуқини қўлга киритишга ҳаракат қилишимиз зарур.
“Реал” ҳозир бу мусобақа ғолиблигига асосий даъвогарлардан бири, бироқ турнирда ҳали яна кучли клублар қолганини унутмаслик керак, - деди Хосеп Гвардиола.
Энди “шаҳарликлар” бор эътиборини Англия Премьер-лигасида кучли тўртликдан ўрин эгаллаш ва Англия кубогида ғолиб чиқиш учун қаратадиган бўлди.
Абдуқодир Ҳусанов эса, 20 январь куни “Манчестер Сити”га кўчиб ўтганидан бери учта нуфузли мусобақа – Англия Премьер-лигаси, мамлакат кубоги ва Европа Чемпионлар лигаси плей-оффидаги дебютларини нишонлади. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
