Умар Кремлёв: "Неча пул сарфланишидан қатъи назар, биз бу жангни Москвага олиб келамиз"

Россиялик ярим оғир вазн тоифаси вакиллари Дмитрий Бивол ва Артур Бетербиев ўртасидаги учинчи жангнинг ўтказилиш эҳтимоли ошди.

Куни кеча Ар-Риёд шаҳрида ўтган жангда келиб чиқиши қирғизистонлик бўлган Дмитрий Бивол рақибини очколар ҳисобига кўра мағлуб этиб, ярим оғир вазн тоифасида мутлақ жаҳон чемпионига айланган эди. Бу билан у илк жангдаги мағлубият учун реванш олиш баробарида 40 ёшли Бетербиевга фаолиятидаги илк мағлубиятни тақдим этди.

Боксчилар учинчи жангга ҳам қарши эмас. Трилогия Россия Федерацияси пойтахти Москва шаҳрида ўтказилиши мумкин. Бу ҳақда Халқаро бокс ассоциацияси (IBA) президенти Умар Кремлёв хабар берди.

"Ўйлашимча, биз учун учинчи жанг керак. Уларнинг ҳар иккиси ҳам дунёнинг энг яхши боксчилари. Трилогияни 100 000 томошабинни ўз бағрига сиғдира олувчи "Лужники" стадионида ўтказишимиз керак. Агар сиз буни истасангиз, неча пул сарфланишидан қатъи назар, биз жангни Москвага олиб келамиз. Музокараларни эртагаёқ бошлаймиз" – деди Кремлёв. “Замин” янгиликларини “Telegram”да кузатиб боринг