16:05 / 26.02.2025

Гвардиола Абдуқодир Ҳусановнинг жамоага таъсири ҳақида фикр билдирди

"Манчестер Сити" бош мураббийи Пеп Гвардиола "Тоттенҳэм"га қарши ўйин олдидан ташкил этилган матбуот анжуманида жамоага янги қўшилган футболчилар ҳақида фикр билдирди. Испаниялик мутахассис ўзбекистонлик ҳимоячи Абдуқодир Ҳусановнинг жамоадаги илк ўйинлари ва унинг ривожланиши ҳақида гапирди.

Ҳусанов жамоага қийин пайтда қўшилди

Гвардиола Абдуқодир Ҳусановнинг жамоага мослашиш жараёни ҳақида шундай деди:
"Ҳусанов "Челси", "Лейтон Ориент", "Ньюкасл", "Реал" ва "Ливерпуль"га қарши майдонга тушди. У жамоага қийин пайтда қўшилди. Франциянинг ўрта савиядаги клубидан келганини ҳисобга олсак, унга АПЛдаги юқори суръатга мослашиш осон бўлмагани аниқ."

Мулоқотдаги қийинчиликлар ва тез ўрганишга интилиш

Гвардиола Ҳусановнинг инглиз тилидаги тажрибаси етарли эмаслигини таъкидлади, бу эса унинг жамоа билан мулоқотига таъсир қилган.

"У ҳали инглиз тилини яхши билмайди. Биз унга буни тезроқ ўрганишни тавсия қилмоқдамиз, чунки футболда мулоқот муҳим аҳамиятга эга. Лекин Ҳусанов жиддий ва камгап йигит, шунинг учун тилни яхши билганда ҳам уни кўп гапиради, деб ўйламайман," — дея ҳазиломуз фикр билдирди мутахассис.

Гвардиола Ҳусановнинг жамоага қўшган ҳиссасини юқори баҳолади

Гвардиола Абдуқодирнинг ҳимоядаги ишончли ўйини ва жамоага қўшган ҳиссасини алоҳида таъкидлади.
"Ҳусанов жуда муҳим рол ўйнамоқда. Унинг тайёргарлиги ва кучли характери бизга фойда келтиряпти," — деди Гвардиола.

Янги трансферлар ҳақида

Гвардиола жамоага қўшилган бошқа футболчилар – Омар Мармуш, Нико Гонсалес ва Витор Рейс ҳақида ҳам фикр билдирди.
"Мармуш ва Гонсалес ҳозирча камроқ ўйин амалиётига эга, лекин улар ўзларини яхши кўрсатяпти. Витор Рейс эса етарли тажриба тўплаши керак, у келажакда жамоага катта ёрдам беради."

"Сити" – "Тоттенҳэм" ўйини олдидан

"Манчестер Сити" ва "Тоттенҳэм" ўртасидаги учрашув бугун, 26 февралдан 27 февралга ўтар кечаси Тошкент вақти билан 00:30 да старт олади. Ҳозирда "шаҳарликлар" 26 турдан кейин 44 очко билан 5-ўринда боряпти, "Тоттенҳэм" эса 33 очко тўплаб 13-поғонада жойлашган.

Гвардиола ва жамоа мухлислари Ҳусановнинг ушбу ўйинда ҳам ишончли ўйин кўрсатишини кутишмоқда.

Футбол