Гвардиола: “Ҳусанов сотиб олинганидан жуда миннатдорман”

Англия кубоги 1/8 финалида "Манчестер Сити" "Плимут"ни 3:1 ҳисобида мағлуб этди, аммо жамоа учун ёмон янгилик бор эди. Ҳимоячилар билан боғлиқ муаммолар яна давом этмоқда – Натан Аке ҳам жароҳат олиб, узоқ муддатга сафдан чиқди.

Ўйиндан сўнг, "Сити" бош мураббийи Хосеп Гвардиола бу ҳақда қуйидагича фикр билдирди:

“Афсуски, яна бир марказий ҳимоячимиз узоқ муддатга сафдан чиқди. Натан Акени соғиниб қоламиз. Аммо клубдан Ҳусанов ва Витор Рейсни сотиб олганидан жуда ҳам миннатдорман. Акс ҳолда биз Чемпионлар Лигаси йўлланмаси ва Англия кубоги учун кураша олмаган бўлардик. Уларсиз бунинг имкони бўлмасди. Чунки бизда фақат Диаш қолган бўларди”, – деди Гвардиола.

"Сити" ҳимоясида жиддий муаммо

"Манчестер Сити"да сўнгги пайтларда ҳимоячилар билан боғлиқ катта муаммолар кузатилмоқда. Аввалроқ жамоанинг етакчи ҳимоячилари Жон Стоунз ва Мануэл Аканжи ҳам жароҳат олиб, узоқ муддатга сафдан чиққанди. Ҳозир эса Натан Аке ҳам улар сафига қўшилди.

Бу ҳолатда ёш ҳимоячилар Абдуқодир Ҳусанов ва Витор Рейс учун катта имконият пайдо бўлмоқда. Улар ҳозир "Сити" мудофаасининг таянчига айланишлари мумкин.

Ҳусанов учун янги синов

Ўзбекистонлик иқтидорли ҳимоячи Абдуқодир Ҳусанов жамоага яқиндагина келиб қўшилди ва унинг “Сити” сафидаги ўйинлари мухлисларда катта қизиқиш уйғотган. У Гвардиоланинг тизимида жуда тез мослашаётганини кўрсатмоқда ва ҳозирги ҳолатда жамоанинг асосий ҳимоячиларидан бирига айланиши мумкин.

"Манчестер Сити"да ҳимоя чизиғидаги бу муаммолар жамоа учун жиддий синов бўлса, Ҳусанов учун эса ҳақиқий имкониятдир. У катта саҳнада ўзини кўрсата оладими? Бунинг жавобини яқин ўйинларда кўрамиз! “Замин” янгиликларини “Telegram”да кузатиб боринг