Оқ уйда Клублар ўртасидаги Жаҳон чемпионати соврини тақдимоти бўлиб ўтди

АҚШ пойтахти Вашингтонда жойлашган Оқ уйда жорий йил ўтказиладиган Клублар ўртасидаги Жаҳон чемпионатига бағишланган расмий тадбир бўлиб ўтди. Тадбир давомида ФИФА президенти Жанни Инфантино ва АҚШ президенти Дональд Трамп мусобақанинг янги бош совринини тақдим қилишди.

Янги шаклдаги мусобақа 2025 йилда АҚШ мезбонлик қиладиган илк йирик клублар чемпионати бўлади. Турнир учун тайёрланган соврин алоҳида эътиборга сазовор. Бир қарашда лаган кўринишида бўлган кубок ўзига хос механизмга эга бўлиб, махсус калит ёрдамида шаклини ўзгартиради.

Трамп ва Инфантино совринни Овал кабинетда намойиш қилар экан, мусобақанинг аҳамияти ҳақида фикр билдиришди. Трамп АҚШ футбол бўйича йирик турнирларни қабул қилишга тайёр эканини таъкидлаган бўлса, Инфантино янги форматдаги мусобақа бутун дунё клублари учун янги имкониятлар эшигини очишини маълум қилди.

Клублар ўртасидаги Жаҳон чемпионати 2025 йилнинг 15 июнь – 13 июль кунлари АҚШнинг бир нечта шаҳарларида бўлиб ўтади. Турнирда 32 та клуб иштирок этади ва улар ФИФА томонидан жорий қилинган янги форматда ғолиблик учун кураш олиб боради.