Анчелоттининг ушбу талаби бажарилмаса “Реал” Ла Лигани бойкот қилмоқчи

Мадриднинг “Реал” клуби Испания Ла Лигаси 28-турида “Вильярреал”га қарши баҳс олиб борди ва 2:1 ҳисобида ғалаба қозонди. Аммо ўйиндан кейинги матбуот анжуманида жамоа бош мураббийи Карло Анчелотти Ла Лигадаги таъқиб жадвалига қарши кескин муносабат билдирди. Унинг айтишича, клуб энди 72 соатдан кам бўлмаган дам олиш вақтисиз майдонга тушмайди. Бу ҳақда Marca нашри хабар берди.

“Реал” футболчиларининг чарчоқ ҳолати

Мадрид клуби 12 март куни УЕФА Чемпионлар Лигаси 1/8 финал босқичида “Атлетико” билан баҳс олиб борди. Шундан атиги уч кун ўтиб, 15 март куни Ла Лигада навбатдаги учрашувини ўтказишга мажбур бўлди. Бу вазият жамоа мураббийлар штаби ва раҳбариятини жиддий ташвишга солди.

Карло Анчелотти ўйиндан сўнг Ла Лигани танқид қилди ва бундай ҳолат такрорланса, жамоа чемпионатни бойкот қилиши мумкинлигини билдирди:

“Бугун 72 соатдан кам вақт дам олиб, майдонга тушишга мажбур бўлдик. Биз бундан кейин буни такрорламаймиз. Раҳбарият Ла Лига билан икки марта музокара ўтказди, аммо ҳеч қандай ўзгариш бўлмади. Агар талаб қилинган дам олиш вақти берилмаса, “Реал” клуби Ла Лига баҳсларида майдонга тушмайди.”

Ла Лига ва “Реал” ўртасида кескинлик ортмоқда

Анчелоттининг ушбу баёноти клуб раҳбарияти ва Ла Лига ўртасидаги муносабатларни янада мураккаблаштириши мумкин. “Реал” раҳбарияти футболчиларнинг жисмоний тайёргарлигини сақлаб қолиш ва уларни жароҳатлардан ҳимоялаш мақсадида қатъий чоралар кўришни режалаштирмоқда.

Бу эса Ла Лига раҳбарияти томонидан қандай қабул қилиниши ва улар жавобан қандай чоралар кўриши номаълум.

Турнир жадвалидаги ҳолат

“Реал” 28-турдан сўнг 60 очко билан 1-поғонани эгаллаб турибди. Уларнинг асосий рақиби “Барселона” эса 57 очко билан 2-ўринда, аммо улар 2 та кам ўйин ўтказган.

Бу можаро “Реал”нинг чемпионлик имкониятларига қандай таъсир қилади? Бу савол ҳали очиқ қолмоқда. “Замин” янгиликларини “Telegram”да кузатиб боринг