"Реал" ёзда қайси позицияларни кучайтирмоқчи?

Мадриднинг "Реал" клуби ёзги трансфер ойнасига жиддий ҳозирлик кўришни бошлади. Жамоа скаутлари асосий эътиборни тажрибали ярим ҳимоячи Лука Модричга муносиб ўринбосар топишга қаратмоқда. SI.com нашрининг хабар беришича, клуб 39 ёшли хорват футболчисининг келажагини ҳисобга олган ҳолда, янги марказий ярим ҳимоячини излашга киришган.

Модрич ҳозирча юқори савияда ўйнашда давом этяпти. У мавсумда 2000 дақиқадан ортиқ майдонда ҳаракат қилди, аммо "Реал" унинг жамоада узоқ қолиш-қолмаслигини олдиндан режалаштирмоқчи. Шу боис мадридликлар унинг ўрнини босадиган футболчиларни изламоқда.

Кимлар асосий номзодлар?

"Қироллик клуби" бу вазифани ҳал қилиш учун бир неча вариантларни кўриб чиқмоқда. Илк номзод сифатида "Байер"нинг 21 ёшли футболчиси Флориан Вирц тилга олинмоқда. Унинг нархи 130 миллион евро атрофида баҳоланмоқда ва мадридликлар аллақачон уни жамоага жалб этиш бўйича таклиф билан чиққан.

Модрич эса ҳали катта футболни тарк этиш ниятида эмас. У "Реал" билан шартномасини яна бир йилга узайтиришни хоҳламоқда. Унинг асосий мақсади — 2026 йилги Жаҳон Чемпионатига қадар юқори савияда ўйнаш. Клуб эса бу борада якуний қарорни май ойида қабул қилади.

Ярим ҳимояга яна кимлар керак?

Аввалроқ "Реал" Модричга ўринбосар сифатида Арда Гюлерни кўрган эди, аммо туркиялик футболчи ҳужумкорроқ ўйинчи бўлгани учун марказдаги ритмни бошқара олиш қобилияти камроқ. Шунинг учун жамоа марказдаги ўйинни назорат қиладиган футболчи излашда давом этяпти.

Ҳимоя чизиғи ҳам кучайтирилади

Фақат ярим ҳимоя эмас, ҳимоя чизиғини ҳам кучайтириш режада бор. "Реал" ҳозирда ўнг қанот ҳимоячиси изламоқда. Асосий номзод сифатида "Ливерпуль" футболчиси Трент Александер-Арнольд тилга олинмоқда. Агар бу келишув амалга ошмаса, мадридликлар "Тоттенҳэм" аъзоси Педро Порро, "Байер" футболчиси Жереми Фримпонг ёки "Севилья" ҳимоячиси Хуанлу Санчес билан музокара ўтказиши мумкин.

Бундан ташқари, жамоа марказий ҳимоя чизиғини ҳам кучайтириш ниятида. "Арсенал" ҳимоячиси Вильям Салиба мадридликлар шорт-листидаги асосий номзодлардан бири ҳисобланади. Чунки унинг "Арсенал" билан амалдаги шартномаси 2027 йилда якунига етади ва ҳозирча уни узайтириш бўйича бир қарорга келинмаган.

"Реал"нинг мавсумдаги натижалари

Маълумот учун, "Реал" 28-турдан кейин Испания чемпионати турнир жадвалида 50 очко билан 2-ўринни эгаллаб турибди. Бу эса жамоани янада кучайтириш зарурлигини кўрсатмоқда. “Замин” янгиликларини “Telegram”да кузатиб боринг