“Манчестер Сити”: Энди бу жойда Ҳусанов ўйнайди...

Жорий чемпионатнинг биринчи ярмида ҳар томонлама катта инқирозга учраган “Манчестер Сити” келаси мавсум олдидан таркибида жиддий ўзгаришлар қилишга киришди.

Бу жараёнда Хосеп Гвардиола бир неча йилдан бери клуб учун хизмат қилиб келган, бироқ ёши ўтиб қолаётган тажрибали ижрочилардан воз кечиб, уларнинг ўрнини янги авлод вакилларига беришни масаланинг энг тўғри ечими, деб топди.

Англия футболининг нуфузли манбаларидан cityxtra.co.uk портали “Манчестер Сити” таркибида юз бераётган авлодлар алмашинувига эътибор қаратди.

- “Шаҳарликлар” жамоада тўпланиб қолган муаммоларга барҳам бериш мақсадида, қишки трансферлар даврида тезкор ҳаракатларни амалга ошириб, қисқа фурсатда 181,5 миллион фунт стерлинг эвазига жамоага “Ланс”дан Абдуқодир Ҳусанов, “Палмейрас”дан Витор Рейс, “Айнтрахт”дан Умар Мармуш ҳамда “Порту”дан Нико Гонсалесни қўшиб олди.

Августдан бери жамоанинг асосий ҳимоячилари Натан Аке, Мануэль Аканжи, Рубен Диас ва Жон Стоунз жароҳатларини даволаш, саломатлигини мустаҳкамлаш ва жисмоний ҳолатини тиклаш учун кўп вақт сарфлаётгани жамоани катта муаммоларга рўбарў қилди.

Январда келган марказий ҳимоячилар – Абдуқодир Ҳусанов ва Витор Рейс жамоа муаммоларига малҳам бўла бошлади. Айниқса, ўзбек ҳимоячиси Хосеп Гвардиола жамоасининг ажралмас қисмига айланиб бўлди.

Яқинда клубда янги спорт директори Уго Виана иш бошлайди ва бу мутахассис келиши билан асосий таркибда жиддий ўзгаришларга қўл уриши кутилмоқда. Ҳозирдан клуб вакиллари айрим ўйинчиларни бошқа жамоаларга ўтказиш пайига тушди.

Бир неча манбаларнинг маълум қилишича, “шаҳарликлар” Абдуқодир Ҳусанов трансфери муваффақиятли чиққанини инобатга олиб, унинг позициясида ўйнайдиган Мануэль Аканжини “Реал” клубига таклиф қилди.

Гарчи мавсум охирида 30 ёшга тўладиган швейцариялик марказий ҳимоячининг манчестерликлар билан яна икки йил давом этадиган шартномаси бўлса-да, клуб раҳбарияти ёзда Аканжини трансферга қўйишга тайёр. Агар Аканжи ҳимоя чизиғиини янгилашга бел боғлаган Мадрид суперклубига маъқул келса, манчестерликлар унинг кетишини қўш қўллаб маъқуллайди, - деб ёзмоқда cityxtra.co.uk портали.

Манбага кўра, Хосеп Гвардиола бир неча йиллар давомида жамоанинг ўзаги бўлиб келган Кевин Де Брюйне, Жек Грилиш, Эдерсон ва Бернарду Силва билан ҳам хайрлашишга тайёр. Хусусан, марказий ҳимоячилар – Натан Аке ҳамда Жон Стоунзнинг ҳам худди Мануэль Аканжи сингари клубдаги келажаги мавҳум бўлиб турибди. Бу ўйинчилар сўнгги 18 ой давомида жисмоний ҳолати ва тайёргарлиги бўйича юқори даражага чиқа олгани йўқ.

Узоқни кўриб иш қилишга кўниккан Гвардиоланинг режасига кўра, Абуқодир Ҳусанов ва Витор Рейс ёнида тажрибали ҳимоячиларидан фақатгина 28 ёшли Рубен Диас қолиши керак. Испаниялик мураббий бу ўйинчи ҳали ўзининг юқори чўққисига чиқиб улгурмагани ва яна ўсишига, ўз навбатида янги ёш ҳимоячиларга кўмакчи бўлишига ишоняпти.

Трансферлар бўйича экспертларнинг таъкидлашича, “Манчестер Сити” мутасаддилари таркибни янгилаш жараёнида тажрибали футболчилар сотувидан келидаган маблағларни ёзда истеъдодли ёш ўйинчиларни олишга йўналтиришни мўлжаллаяпти. “Замин” янгиликларини “Telegram”да кузатиб боринг