Москванинг "ЦСКА" клуби ярим ҳимоячиси Аббосбек Файзуллаев Туркиянинг "Галатасарой" клуби томонидан бўлаётган қизиқишларга муносабат билдирди. Футболчи "Match TV" телеканалига берган интервьюсида бу борада гапиришни истамаслигини ва ҳозир барча эътибори "ЦСКА"да эканини маълум қилди.
"Бу ҳақда гапиришни истамайман, ҳозир вақти эмас. Менинг "ЦСКА" билан шартномам бор, бу мавзуда гапириш клубга нисбатан ҳурматсизлик бўлади. Ҳозир барча эътиборим "ЦСКА"га қаратилган", - дея таъкидлади Файзуллаев.
Аввалроқ Туркиянинг "Markaj News" нашри "Галатасарой" ёзги трансфер ойнаси давомида ўз таркибини кучайтириш мақсадида Файзуллаевни кузатаётгани ҳақида хабар берган эди. Бироқ футболчининг ўзи бу ҳақда фикр билдиришдан тийилди.
Шу билан бирга, Россия Премьер Лигасининг 22-турида "ЦСКА" ўз майдонида Махачқалъанинг "Динамо" жамоасини қабул қилиб, 2:0 ҳисобида ғалаба қозонди. Файзуллаев мазкур учрашувда асосий таркибда майдонга тушиб, 87 дақиқа ҳаракат қилди ва жамоасининг муҳим ғалабасига ҳисса қўшди.
Марко Николич бошқарувидаги "ЦСКА" 41 очко тўплаб, турнир жадвалида бешинчи ўринни эгаллаб турибди. Клуб навбатдаги учрашувини Москванинг бошқа бир жамоаси "Динамо"га қарши ўтказади.
Файзуллаевнинг "ЦСКА"даги фаолияти муваффақиятли давом этар экан, унинг келажаги борасидаги тахминлар тобора кўпаймоқда. "Галатасарой"нинг қизиқиши расман тасдиқланмаган бўлса-да, бу футболчининг Европа футболидаги нуфузи ошиб бораётганини кўрсатмоқда. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
