14:39 / 02.04.2025
1 840

“Бенфика” Аббосбек Файзуллаев трансферидан нега воз кечган эди?

“Бенфика” Аббосбек Файзуллаев трансферидан нега воз кечган эди?
“ЦСКА” клуби ва Ўзбекистон терма жамоаси футболчиси Аббосбек Файзуллаевнинг Европага йўл олиши мумкинлиги ҳақида кўплаб хабарлар тарқалган эди. Айниқса, унинг Португалиянинг “Бенфика” клубига ўтиш эҳтимоли юқори баҳоланганди. Бироқ охир-оқибат ушбу трансфер амалга ошмай қолди.

Футболчининг агенти Гермaн Ткаченконинг маълум қилишича, Файзуллаевнинг “Бенфика”га ўтиши бўйича дастлаб музокаралар олиб борилган. Аммо сўнгги босқичда Лиссабон клуби раҳбарияти сиёсий сабабларга кўра бу келишувдан воз кечган.

Ткаченко бу ҳақда шундай дейди:

"Биз Файзуллаевни 'Бенфика'га трансфер қилишимиз мумкин эди. Дастлабки музокаралар яхши кетаётганди, аммо Португалия клуби рус футболчилари ёки Россия клубларида тўп сураётган футболчилар билан алоқа ўрнатишни истамади. Улар ‘Россия билан ҳамкорлик қилмаймиз’ деган позицияни билдирди."

Маълумот учун, Файзуллаев 2023 йилда “Пахтакор” клубидан Москва ЦСКАсига ўтган ва тезда жамоанинг асосий ўйинчилари қаторига қўшилганди. Унинг Европага йўл олиши ҳақида турли тахминлар мавжуд. Аввалроқ 21 ёшли вингерга Германиянинг “Бавария” ҳамда Туркиянинг “Галатасарой” клубларидан таклифлар борлиги ҳақида хабарлар тарқалганди.

Ҳозирча футболчининг келажаги ҳақида аниқ қарор қабул қилинмаган. Бироқ унинг истеъдоди ва ўсиш суръати ҳисобга олинса, Европанинг йирик клублари унга қизиқишда давом этади.
Ctrl
Enter
Хато топдИнгизми
Иборани ажратиб Ctrl+Enter тугмасини босинг
Янгиликлар » Спорт