Ўзбекистон У-17 терма жамоаси мураббийи Таиландга қарши ўйин ҳақида нималар деди?

Ўзбекистон У-17 терма жамоаси бош мураббийи Ислом Исмоилов Таиландга қарши йирик ҳисобдаги ғалабадан сўнг ўз фикрларини билдириб ўтди.

- "Дастлабки учрашув бўлгани боис, йигитларда ҳаяжон сезилди. Бу ёшдаги футболчиларда, юқори даражадаги турнирда биринчи бор иштирок этаётганликлари сабаб, шундай ҳолат кузатилиши табиий. Биринчи бўлимни яхши бошладик. Ўйин аввалида тезкор гол киритишга муваффақ бўлдик. Шундан сўнг футболчиларимиз хотиржамликка берилишди, бу ўйинга таъсир қилди. Ҳимоядан ҳужумга ўтишда муаммолар юзага келди. Натижада гол билан жазоланишга мажбур бўлдик.

Иккинчи бўлимда бир қатор ўзгаришларга қўл уриб, камчиликларни бартараф этишга ҳаракат қилдик ва ғалабани мустаҳкамладик. Натижадан хурсандман, бироқ ўйин сифатидан қониқмадим. Сабаби, биз бундан-да яхшироқ ўйин кўрсата оламиз. Бугунги учрашувни таҳлил қилиб, келгуси ўйинларда сифатли футбол кўрсатишга ҳаракат қиламиз" - деди терма жамоа бош мураббийи Ислом Исмоилов.

Маълумот ўрнида, вакилларимиз навбатдаги учрашувини 6 апрель куни Тошкент вақти билан 20:00 да Хитойга қарши ўтказади. “Замин” янгиликларини “Telegram”да кузатиб боринг