Ўзбекистон U-17 бош мураббийи Хитой билан баҳс олдидан фикр билдирди

Ўзбекистон U-17 терма жамоаси бош мураббийи Ислом Исмоилов Хитойга қарши бўладиган ўйин олдидан ўз фикрларини билдирди.

"Вақтимиз кам бўлгани сабабли, кечаги учрашувни тезкорлик билан таҳлил қилдик ва бугундан Хитойга қарши баҳс учун тайёргарликни бошладик. Хитой ёшлар футболи Осиёда ўз ўрнига эга, шунинг учун осон ўйин бўлмаслиги аниқ. Таиланд билан учрашувдаги хатолардан келиб чиқиб, йигитларга керакли кўрсатмаларни бердик ва тактик ишланмаларни амалга оширишга киришдик.

2024 йил август ойида Хитойда бўлиб ўтган халқаро турнирда мезбонларга қарши ўйнаганмиз. Шу боис, ушбу жамоага қарши қандай ўйин кўрсатиш бўйича маълумотларимиз бор. Бундан ташқари, рақибнинг Осиё кубоги саралаш босқичидаги ҳар бир учрашуви ва ўтказган ўртоқлик ўйинларини таҳлил қилиб, ўзимиз учун керакли хулосаларга келдик. Худо хоҳласа, гуруҳимиздаги иккинчи баҳсда ҳам ғалаба қозониб, ўзбек футболи мухлисларини хурсанд қилиш учун ҳаракат қиламиз", — деди Ислом Исмоилов.

Ўйин 6 апрель куни Тошкент вақти билан соат 20:00 да Тоиф шаҳридаги "Оказ" стадионида старт олади. “Замин” янгиликларини “Telegram”да кузатиб боринг