Анвар Бердиев: "Ҳужумчи битта ҳимоячини алдаб ўта олмаса, у ҳужумчи ҳисобланмайди"

Суперлиганинг 4-туридан ўрин олган "Шўртан" - "Насаф" (1:4) учрашувидан сўнг ғузорликлар бош мураббийи Анвар Бердиев фикрлари билан ўртоқлашди.

"Ўйин ҳақида нима дейиш мумкин, Ўзбекистоннинг энг кучли жамоасига қарши ўйнадик. "Насаф" жамоасини ғалаба билан табриклайман.

- "Шўртан" жамоаси олдига қандай вазифа қўйилган?
- Мақсадимиз ҳар бир ўйинда ғалаба қозониш. Бу йил бизга жуда қийин бўлишини биламиз. Шунга қарамасдан ҳаракат қиламиз. Футболчиларимизнинг кўпи Про лигада ўйнаган. Ўйлайманки, улар ўйиндан-ўйинга ўзларини кўрсатиб боришади.

- Қишда таркибга бир неча нафар футболчилар таклиф қилинди. Мазкур трансферлардан кўнглингиз тўляптими?
- Биз имкон даражасида вазиятимиздан келиб чиқиб футболчи танладик. Истаймизми ёки йўқ Суперлигада футболчиларнинг маҳорати ўйин натижасини ҳал қилиб кетмоқда. Таркибимизга жалб қилинган футболчиларга ишонаман. "Насаф" жамоасида бошқача вазифа. Кўп ёш футболчилар ишончни оқлашга ҳаракат қилишса бундан ҳам кучлироқ ўйнай олишади.

- Қайси чизиқлар қониқтирмаяпти?
- Тўғрисини айтсам бизнинг оқсаётган чизиғимиз ҳужум нуқтаси бўлиб турибди, қишда ҳам яхши ҳужумчи топишга ҳаракат қилдик.

- "Шўртан"нинг Суперлигадаги имкониятларини неча фоизга баҳолайсиз?
- Олдиндан бирор нарсани башорат қила олмайман. Ўзимизнинг майдонга қайтсак ғузорлик мухлислар олдида кучлироқ ўйнашга ҳаракат қиламиз. Уйда футболчилар ҳам бошқача иштиёқ билан тўп тепади.

- Жамоа 4 та ўйинда 1 очко ишлади. Кўп очко йўқотяпти. Кейинги ўйин "Навбаҳор"га қарши бўлади. Бу ўйинда ҳимоявий ўйин тактикасида ва натижа учун ўйналадими? Балки ротациялар қилишга ҳаракат қиласизми?
- Бу ўйингача камчиликларимиз устида ишлаймиз. Ҳимоявий тактика ҳар доим иш бериши қийин. Ўзим ҳужумкор ўйин тарафдориман. Агар олдиндаги футболчилар вазиятларни голга айлантира олмаса жуда қийин. Энг яхши ҳимоя ҳужум дегани.

- Сиз ўйнаган даврда яққол ҳужумчи ажралиб турарди. Анвар Бердиев гол уришини олдиндан ҳамма биларди. Ҳозир нима учун ҳужумчилар чиқмаяпти?
- Тўғрисини айтсам индивидуал кучли футболчилар камайиб кетди, чунки кўплар жамовий ўйинга эътибор қаратмоқда. Ўзбекистонда иқтидорли футболчилар кўп. Агар улар билан ишлашса яна вақти келиб Исоқов, Ҳамидуллаевга ўхшаган футболчилар етишиб чиқади. Агарда ҳужумчи битта ҳимоячини алдаб ўта олмаса у ҳужумчи ҳисобланмайди. Бу менинг шахсий фикрим. Неча йилдан бери Суперлигада легионер футболчилар тўпурар бўлиб келяпти.

- Муҳриддин Зоиров жамоа билан Суперлигага чиқди. Унинг ўрнини қандай тўлдирмоқчисиз?
- Зоировни жамоада олиб қолмоқчи эдик. Лекин бизнинг таклиф қилган шартларимиз маъқул келмади шекилли бошқа жамоага йўл олди. Ҳозир таркибдаги бор футболчилардан фойдаланиб турамиз.

Манба: Championat.asia “Замин” янгиликларини “Telegram”да кузатиб боринг