Бернарду Силва “Манчестер Сити”ни тарк этишга тайёр — у “Бенфика”га қайтмоқчи

Португалия терма жамоаси ва “Манчестер Сити” ярим ҳимоячиси Бернарду Силва жорий мавсум якунланиши билан клубни тарк этиши мумкин. Бу ҳақда Португалиянинг “A Bola” нашри хабар берди.

Юрак “Бенфика”да қолган

30 ёшли футболчи ўз ватанига қайтишни кўзламоқда. Манбаларга кўра, Лиссабоннинг “Бенфика” клуби Бернарду билан алоқада ва уни жамоага қайтариш имкониятини ўрганмоқда. Қизиғи шундаки, Бернарду Силва Бенфика академияси тарбияланувчиси ҳисобланади ва у ўзини “ушбу клубда қарздор ҳис қилар экан”.

Футболчининг ўз истагига кўра, маошини камайтиришга ҳам тайёрлиги айтилаяпти. Бу эса “Бенфика”га катта моддий юклама бўлмасдан топ-футболчини қайтариш имконини беради.

“Сити” янгиланишга тайёр

“Манчестер Сити” бош мураббийи Пеп Гвардиола ёзда таркибда янгиланиш бошлашни режалаштирган. Шу боис Бернарду билан хайрлашишга рози бўлиши мумкин.

Футболчининг трансфер нархи 45 миллион евро деб баҳоланмоқда. Унинг клуб билан амалдаги шартномаси 2026 йилнинг ўрталаригача амал қилади.

Бернарду Силва 2017 йилдан бери “Сити” сафида ҳаракат қилмоқда ва бу вақт ичида бир неча бор Англия чемпиони, Чемпионлар Лигаси ғолиби бўлган. Унинг тажрибаси ва ижодкорлиги “Бенфика”га янги нафас олиб келиши мумкин.

Шухрат Раззаков

«ЗАМИН.УЗ» муҳаррири