Месси футболда яна қанча қолади? Ўзи жавоб берди

Ҳозирда “Интер Майами” шарафини ҳимоя қилаётган футбол юлдузи Лионель Мессининг фаолиятини яна қанча давом эттириши ҳамон футбол мухлислари учун қизиқ мавзулардан бири бўлиб қолмоқда. Саккиз карра "Олтин тўп" соҳиби шу масалага аниқлик киритиб, ўзининг келгуси режаларини маълум қилди.

"Олдин ҳам кўп бор айтганимдек, ҳозирги пайтда фақат ўзимнинг жамоам ва ўйинимга диққатни жамлаганман. Аммо жаҳон чемпионати ҳақида ўйламаяпман десам, нотўғри бўлади. Албатта, мен мундиалда қатнашишни истайман ва бу ҳақда ўйлаяпман.

Бироқ бу мавсум менинг келажагим ҳақида якуний қарор чиқаришим учун жуда муҳимдир. Агар юқори савияни ушлаб тура олсам, албатта фаолиятимни давом эттиришни хоҳлайман", – деди Лионель Месси.

Эслатиб ўтамиз, 37 ёшли аргентиналик юлдуз ўзининг халқаро фаолиятини 2005 йили бошлаган. Шу кунгача у Аргентина терма жамоаси сафида 191 ўйинда майдонга тушиб, 112 та гол уришга муваффақ бўлган. Бу кўрсаткич бўйича Мессидан олдинда фақатгина португалиялик юлдуз Криштиану Роналду бор.

Жаҳон футболида сўнмас юлдуз сифатида қолган Месси, шунча йиллик фаолиятдан сўнг ҳам мундиалда қатнашишни “ўйлаб кўраётган”и билан мухлислар учун умид уйғотди.

Сиз нима деб ўйлайсиз: Месси 2026 йилги мундиалда Аргентинани яна етаклай оладими? «Замин»ни Telegram’да ўқинг!