Абдуқодир Ҳусанов Криштиану Роналду билан бир жамоада?

^{Коллаж: kursiv.media, бильд-редактор: Артур Алескеров}
Жаҳон футболи афсонаси Криштиану Роналду фаолиятида кутилмаган бурилиш содир бўлиши мумкин. 40 ёшли португалиялик юлдуз янги мусобақада қатнашиш учун яна бир бор жамоасини ўзгартиришга тайёр.

ФИФА томонидан янгича форматда ташкил қилинаётган клублар ўртасидаги жаҳон чемпионати кўплаб юлдуз футболчилар, жумладан, Криштиану Роналду ва Лионель Месси учун катта қизиқиш уйғотди. Мессидан фарқли ўлароқ, ҳозирда Саудия Арабистонининг «Ан-Наср» жамоасида тўп тепаётган Роналду бу нуфузли мусобақада иштирок этиш имкониятига эга эмас.

Шу сабабли, португалиялик юлдузнинг қисқа муддатли шартнома орқали клублар ўртасидаги жаҳон чемпионатида қатнашадиган жамоа билан келишув имзолаши ҳақида хабарлар пайдо бўлди. ФИФА 1–10 июнь кунлари махсус трансфер ойнасини очади ва айнан шу пайтда Роналдунинг сенсацион трансфери рўй бериши мумкин.

Араб журналисти Носир Жаббор (Sport Bible) маълум қилишича, Криштиану Роналду ушбу мусобақада «Манчестер Сити» клуби таркибида иштирок этиши мумкин. «Шаҳарликлар» ҳам бир ойлик келишув асосида дунёнинг энг машҳур футболчиси хизматидан фойдаланишга қарши эмаслар. Шунингдек, Лондоннинг «Челси» клуби ҳам португалиялик юлдуз билан қисқа муддатли шартнома имзолашга тайёр эканлигини билдирган.

Агар ушбу трансфер амалга ошса, ўзбекистонлик футбол мухлислари учун ҳам қизиқарли воқелик юз беради. Миллий терма жамоамиз ҳимоячиси Абдуқодир Ҳусанов айнан «Манчестер Сити» таркибида Криштиану билан биргаликда майдонга тушиши мумкин. Бу эса Жалолиддин Машариповдан кейин Роналду билан бир клубда тўп тепган иккинчи ўзбек футболчиси бўлиш имкониятини беради.

Эслатиб ўтамиз, Жалолиддин Машарипов «Ан-Наср» жамоасида Роналду билан биргаликда ўйнаб, ўзининг 7-рақамини машҳур юлдузга тақдим этган эди. Кейинчалик уларнинг йўллари айрилди ва Машарипов Эрон чемпионатига йўл олди.

Янги форматдаги клублар ўртасидаги жаҳон чемпионати 2025 йилнинг 15 июнидан 13 июлигача АҚШда бўлиб ўтади. Турнирда дунёнинг 32 та энг кучли жамоаси қатнашади. Мусобақанинг мукофот жамғармаси бир миллиард доллардан ошиши кутилмоқда.

«Манчестер Сити» гуруҳ босқичида Италиянинг «Ювентус», Марокашнинг «Видад» ва БААнинг «Ал-Айн» клублари билан баҳс олиб боради.

Сиз нима деб ўйлайсиз: Криштиану Роналду яна бир бор жаҳон саҳнасида порлайдими? Ҳусанов билан бир майдонда тўп суриш — орзудек вазият эмасми? «Замин»ни Telegram’да ўқинг!