Виталий Левченко "Нефтчи"нинг бугунги мағлубияти ҳақида нималар деди?

Суперлига 5-туридан ўрин олган "Нефтчи" - "Пахтакор" (0:4) учрашувидан сўнг фарғоналиклар бош мураббийи Виталий Левченко матбуот анжуманида иштирок этди.

"Бир нима дейиш қийин. "Пахтакор"ни ғалаба билан табриклайман, улар ғалабага лойиқ эди. Рақиб бизни мағлуб этгани йўқ, биз ўзимиз ўйинни ютқазиб қўйдик, сабаби дастлабки голдан ташқари қолган барча учта гол ўзимизнинг хатоларимиз туфайли бўлди. Тўпни йўқотиш ва нотўғри паслар. Рақиб тартибли ўйнади ва хатоларни кутди. Афсуски, биз кўп маротаба тўпларни йўқотдик ва рақиб ушбу йўқотишлардан унумли фойдаланди ва голлар урди. Биз "Пахтакор"нинг бундай тартибли ўйинига тайёр эмас эдик" - дея фикр билдирди Виталий Левченко бугунги баҳс ҳақида.

- Биринчи бўлимда "Нефтчи" "шок" ҳолатига тушиб қолди. Футболчиларни алмаштириш орқали ушбу вазиятдан чиқиш кетиш бўйича чора кўришингиз мумкин эдими?
- Биринчи таймнинг ўзидаёқ бундай қарор қабул қилиш нотўғри бўларди, менимча. Биз бугун футбол ўйнамоқчи эдик. Майдон марказида хатоларга йўл қўйдик ва рақиб бундан фойдаланди. Биз рақибга бўшлиқларни тақдим этдик. Ўйин давомида футболчиларни ўзгартириш руҳий жиҳатдан нотўғри бўлар эди. Танаффусда эса қилган хатоларимизга тўхталиб ўтдик ва янги футболчиларни майдонга туширдик. Йигитларга очиқ зоналарни ёпиш кераклигини айтдим. Танаффусдан кейин эса "Пахтакор" ҳисоб бўйича ўйнади ва ўйин мантиқий якунига етди. Ўз хатоларимизни кўриб чиқамиз ва хулосага келамиз. Вазиятни ўнглаб олиш ва хулоса қилиш учун, бир маротаба 0:4 ёки 0:5 ҳисобида мағлуб бўлган яхши. Умид қиламанки, биз хатоларимиздан хулоса чиқарамиз.

- Дарвозабон рақиб йўллаган зарбаларни бартараф этиши мумкин эдими?
- Бизда дарвозабонлар бўйича мураббий бор. Мен айбни ҳеч кимга юклаб қўймоқчи эмасман. Барчаси учун бош мураббий жавобгар. Ҳозир барчасини таҳлил қилиб чиқишимиз керак, кимдирга эътироз билдириш ёки хато қилганликда айблаш нотўғри. Ҳиссиётларга берилган вазиятда бундай қилиб бўлмайди. Мухлисларимиздан узр сўрайман, улар жамоани яхши қўллаб-қувватлашди.


Манба: championat.asia «Замин»ни Telegram’да ўқинг!