Элдор Шомуродов "Рома" қаҳрамонига айланди!

Ўзбекистон миллий терма жамоасининг етакчи ҳужумчиси Элдор Шомуродов Италия чемпионати доирасида "Верона" клубига қарши баҳсда "Рома"нинг асосий қаҳрамонига айланди. Айни ўйинда у ягона голни уриб, жамоасига муҳим ғалабани тақдим этди.

Шомуродовнинг голи "Рома" учун нафақат уч очко, балки Чемпионлар лигаси йўлланмасига эришиш йўлидаги муҳим қадам ҳам бўлди. Ушбу муваффақиятдан кейин римлик мухлислар ўзбек ҳужумчисининг номини қувонч билан тилга олиб, ижтимоий тармоқларда уни қўллаб-қувватлашмоқда.

Ўйиндан сўнг Элдор мухлисларнинг катта ролига алоҳида эътибор қаратди:

"Биз Чемпионлар лигасига чиқишни жуда хоҳлаймиз. Бунга эришиш учун ҳар бир ўйинда ғалаба қозонишимиз зарур. Мураббийимиз бу баҳс осон бўлмаслигини айтган эди, лекин биз уддаладик. Айниқса мухлисларга раҳмат, улар стадионда ажойиб муҳит яратишди ва бу бизга жуда катта куч берди", — деди Шомуродов.

Эслатиб ўтамиз, бу мавсумда 29 ёшли ўзбек форварди "Рома" таркибида 32 та ўйинда майдонга тушиб, жамоаси учун 7 та гол ва 2 та голли узатмани амалга оширган.

Шомуродовнинг муҳим голлари Италиядаги мухлислар орасида ҳам унинг обрўсини тобора ошириб, ўзига хос ҳурмат қозонишига хизмат қилмоқда. Ўзбек мухлислари эса ўз навбатида Элдордан янги ғалабалар ва чемпионликлар кутмоқда. «Замин»ни Telegram’да ўқинг!