Элдор Шомуродов ва Матиас Суле "Интер"га қарши курашда "Рома"нинг асосий умидига айланди!

Жорий мавсумда Европанинг энг нуфузли клублар мусобақаси – Чемпионлар лигасига йўлланма олиш учун шиддатли кураш олиб бораётган “Рома” клуби Италия чемпионатининг 34-турида энг жиддий ва қийин рақиб билан тўқнаш келади.

27 апрель куни Клаудио Раньери бошқарувидаги римликлар жамоаси чемпионлик пойгасида 71 очко билан биринчи поғонада бораётган “Интер” меҳмони бўлади. Ҳозирги ҳолатда бу баҳс нафақат икки клуб мухлислари, балки нейтрал томошабинлар учун ҳам қизғин кутилмоқда.

Италиянинг нуфузли спорт нашрлари “Рома” бош мураббийи Клаудио Раньери асосий ҳужумчилари Пауло Дибаланинг жароҳати ва Артём Довбикнинг ўз формасини йўқотганидан сўнг, янги ҳужумчилар жуфтлигини шакллантирганига алоҳида эътибор қаратишмоқда. Бу тандем эса – ўзбекистонлик Элдор Шомуродов ва аргентиналик иқтидорли ҳужумкор ярим ҳимоячи Матиас Суледан иборат.

Хусусан, чемпионатнинг сўнгги учрашувида айнан шу икки футболчи “Рома”нинг "Верона" устидан қозонган муҳим ғалабасида ҳал қилувчи роль ўйнади. Матиас Суленинг аниқ узатмасини қабул қилиб олган Элдор Шомуродов рақиб дарвозасига ягона ва ғалаба келтирувчи голни киритиб, мухлисларни қувонтирган эди.

La Gazzetta dello Sport нашрининг таъкидлашича, Элдор Шомуродов ва Матиас Суле жуфтлиги сўнгги турларда “Рома”ни муҳим натижаларга элтиб, клубнинг орзулари томон етакламоқда. Бу икки футболчи кўплаб учрашувларда жамоанинг ҳал қилувчи голлари ва голли пасларига муаллифлик қилмоқда.

Жорий мавсумда аргентиналик иқтидорли футболчи кетма-кет 9 учрашувда асосий таркибда майдонга тушиб, “Парма”, “Эмполи” ва “Лацио” дарвозасига муҳим голлар уришга эришди. Шунингдек, Элдор Шомуродов “Монца” ва “Верона”га қарши учрашувларда ғалаба тўпларини киритишда айнан Суленинг ёрдамидан фойдаланди.

Ўз навбатида, ўзбек ҳужумчиси Элдор Шомуродов ҳам жорий мавсумда ажойиб спорт формасини намойиш қилиб, шу кунга қадар 7 та гол ва 3 та голли пасни амалга оширди. Бу унинг 2021 йилдан бери “Рома” сафидаги энг яхши кўрсаткичи ҳисобланади.

Қатор таниқли ва ишончли манбалар Клаудио Раньери "Интер"га қарши бўлиб ўтадиган муҳим баҳсда ҳам айнан Шомуродов-Суле жуфтлигига ишонч билдиришини тахмин қилмоқда.

– Ўзбекистонлик футболчининг Италия чемпионатидаги ўйинларини кузатсак, у гол урган жамоалар рўйхатида "Интер"нинг ҳам борлигини кўрамиз. Бундан роппа-роса бир йил муқаддам – 2024 йилнинг 14 апрелида Элдор Шомуродов, ўша пайтда ҳам Клаудио Раньери қўл остида "Кальяри" таркибида "Жузеппе Меацца" стадионида ажойиб гол киритиб, миланликларни ранжитган эди.

Ўша учрашувнинг 64-дақиқасида Элдор урган ажойиб гол “Кальяри”га қимматли бир очко тақдим этган ва жамоанинг олий лигада қолишида муҳим роль ўйнаганди.

Мана, орадан бир йилдан кўпроқ вақт ўтиб, Элдор Шомуродов яна бир бор ўзининг сеҳрли ўйинини "Интер"га қарши намойиш қилиш имкониятига эга бўлди. Бу гал эса унинг шериги – аргентиналик иқтидор эгаси Матиас Суле бўлади.

Италиянинг спортга ихтисослашган nufuzli vocegiallorossa.it портали таҳлилчиси Марко Компанелланинг фикрига кўра, кейинги пайтларда ўзларига ишончи ошиб бораётган Элдор ва Суле жамоанинг ғалабаларида асосий фигуралардан бирига айланиб бўлган. Шу сабабли ҳам, жамоа мураббийлари штаби айнан шу икки футболчига ишонч билдириши табиийдир.

"Интер" ва "Рома" ўртасидаги шиддатли ва муҳим учрашув 27 апрель куни Тошкент вақти билан соат 18:00 да Миландаги машҳур "Жузеппе Меацца" стадионида бошланади. Бу баҳс "Рома"нинг Чемпионлар лигасига чиқиши учун ҳам, "Интер"нинг чемпионлик учун курашида ҳам муҳим аҳамият касб этади. Мухлислар эса Элдор Шомуродов ва Матиас Суленинг ёрқин ўйинидан умид қилмоқда. «Замин»ни Telegram’да ўқинг!