Рюдигер «Барселона»га қарши учрашувдаги қилмиши учун узр сўради

Испания Кубоги финали доирасида бўлиб ўтган «Эл-Класико» учрашувида «Реал» жамоаси «Барселона»га қарши кескин кечган баҳсда 2:3 ҳисобида аламли мағлубиятга учради. Ўйиндаги энг эсда қоларли ҳолатлардан бири мадридликлар ҳимоячиси Антонио Рюдигер билан боғлиқ воқеа бўлди.

Қўшимча вақтнинг охирги дақиқаларида захирага олинган германиялик футболчи ҳакам Рикардо Де Бургос Бенгоэчеанинг қароридан қаттиқ норози бўлиб, ўзини бошқара олмади. Майдонга чиқиб ҳакам билан тортишмоқчи бўлган Рюдигерни жамоадошлари зўрға тўхтатиб қолди. Аммо бу билан вазият тинчимади: Рюдигер ҳакам томон муз билан тўлдирилган пакетни отди. Бош ҳакам унинг бу қилмишини қизил карточка билан жазолади.

Бироқ, қизил карточка билан ҳам қониқмаган ҳимоячи трибуна ичкарисидан яна қайтиб чиқиб, ҳакамга қўшимча таҳдид қилди. Унинг бу ҳаддан ташқари тажовузкор хатти-ҳаракати экспертларнинг жиддий эътирозига сабаб бўлди. Мутахассислар Антонио Рюдигер ушбу ҳаракатлари учун узоқ муддатли дисквалификация қилиниши мумкинлигини таъкидлашмоқда. Уларнинг тахминича, футболчига 12 та ўйингача дисквалификация жазоси берилиши эҳтимоли юқори.

Учрашувдан кейин ўз хатосини тушуниб етган футболчи, ўз ҳаракатлари учун очиқ-ойдин пушаймонлигини билдириб, мухлислар ва ҳакамдан узр сўради.

«Менинг бугунги хатти-ҳаракатимни ҳеч нарса билан оқлаб бўлмайди. Ўйин пайтида ўзимни назорат қила олмадим, бу эса мен учун жуда катта хатодир. Ўзимни жуда ёмон ҳис қиляпман ва бу ишим учун чин юракдан пушаймонман», — деди Рюдигер.

Шунингдек, германиялик ҳимоячи жамоаси кўрсатган ҳаракатдан мамнунлигини, лекин якуний дақиқаларда ўз хатоси билан шерикларини ноқулай вазиятда қолдирганини ҳам тан олди.

«Айниқса иккинчи бўлимда биз жуда яхши ўйин кўрсатдик. Аммо 111-дақиқадан кейин жамоамга ёрдам бера олмадим. Баҳснинг якунига яқинлашган вақтда мен йўл қўйган бу хато эса вазиятни янада оғирлаштирди. Бу ҳаракатим билан мен кимнингдир ишончини поймол қилган бўлсам, уларнинг ҳаммасидан ва албатта, бош ҳакамдан яна бир марта самимий узр сўрайман», — деб таъкидлади мадридлик футболчи.

Маълумот учун, «Реал» бу мағлубиятдан сўнг, ўз тарихида 21-маротаба Испания кубоги финалида мағлубиятга учради. «Барселона» эса 32-маротаба мамлакат кубогини қўлга киритиб, ушбу турнир тарихидаги рекорд натижасини янада яхшилади. «Замин»ни Telegram’да ўқинг!