Аббосбек Файзуллаев: «Янги позициямда ўйиним бироз пасайганини ўзим ҳам ҳис қиляпман»

Россиянинг ЦСКА клубида фаолият олиб бораётган ўзбекистонлик иқтидорли ярим ҳимоячи Аббосбек Файзуллаев ўз ўйинидаги ўзгаришлар ҳақида "Матч ТВ" телеканалига интервью берди. Москва дербисида «Спартак» устидан қозонилган муҳим ғалабадан (2:1) сўнг Аббосбек ўзининг ҳозирги ҳолатига ойдинлик киритди.

— Жорий мавсумда кўрсаткичларим ўзгарганини ўзим ҳам сезиб турибман. Бу мен учун янги позиция бўлиб, майдонда олдингига нисбатан кўпроқ ҳимояга қайтишим талаб қилиняпти. Балки шу туфайли аввалги каби ёрқин ўйиним чиқмаётгандир. Лекин энг муҳими — бу жамоага ёрдам бериш. Агар бош мураббий мени шу ерга қўйса, албатта, у ерда ҳаракат қилиб, бор кучим билан жамоамга фойда келтиришга ҳаракат қиламан, — деди футболчи.

Ушбу масала бўйича бош мураббий Марко Николич билан муҳокама бўлганми, деган саволга Аббос қуйидагича жавоб берди:

— Ҳа, албатта. Мураббийлар жисмоний ҳолатимни яхши билишади. Қишки йиғин давомида жисмоний синовлардан яхши ўтган эдим. Шу сабабли ҳам Николич мени ушбу позицияда кўришни хоҳлади ва қандай ўйнашим кераклигини батафсил тушунтириб бермоқда.

Эслатиб ўтамиз, 21 ёшли ўзбекистонлик футболчи жорий мавсумда ЦСКА сафида барча мусобақаларда 33 та ўйинда майдонга тушиб, ўз ҳисобига 3 та гол ҳамда 7 та голли узатмани ёздириб қўйди.

Аббосбек Файзуллаев ва унинг жамоаси ЦСКА айни пайтда Россия Премьер-лигаси турнир жадвалида 51 очко билан учинчи ўринни эгаллаб турибди. «Замин»ни Telegram’да ўқинг!