Хаби Алонсо “Реал”ни қабул қилишга тайёр: у жамоага олиб келадиган футболчилар номини айтди

Карло Анчелоттидан кейин Мадриднинг “Реал” клубини ким бошқариши ҳақидаги савол сўнгги пайтларда кўп муҳокама қилинмоқда. Айни вақтда Германиянинг “Байер” клубида яхши натижалар кўрсатаётган испаниялик мураббий Хаби Алонсо “Қироллик клуби” раҳбариятининг асосий танлови сифатида кўрилмоқда.

Мадрид клубига яқин манбаларнинг маълум қилишича, Алонсо ҳам ўз навбатида “Реал”ни бошқаришга ҳозирдан тайёргарлик кўрмоқда. У жамоа раҳбарияти билан бўлиб ўтган музокараларда клуб келажаги учун ўзининг аниқ режалари ва талабларини қўйган.

Хаби Алонсо айниқса уч позиция – марказий ҳимоя, чап қанот ҳимояси ва ярим ҳимоя чизиғини кучайтириш зарурлигини таъкидлаган. Унинг фикрича, бу позициялар унинг ўзи амалга оширмоқчи бўлган тактик услубига идеал даражада мос келиши керак.

Жумладан, Алонсо жамоа раҳбарларидан чап қанот ҳимоячиси сифатида ҳозир “Жирона”да тўп сураётган ва аввал ҳам “Реал” академиясида тарбияланган Мигель Гутьерресни ортга қайтаришни сўраган. Мутахассис ушбу футболчининг салоҳиятига юқори баҳо бермоқда ва унинг жамоага қўшилиши клуб учун катта фойда келтиради, деб ҳисоблайди.

Шунингдек, Алонсо ярим ҳимоя чизиғини янада кучайтириш учун “Реал Сосьедад”нинг истеъдодли вакили Мартин Субимендини олиб келишни талаб қилган. Бу футболчи Испания чемпионатида охирги пайтларда энг юқори баҳоларни олиб келаётгани боис, унинг трансфери Мадрид клубига кўп фойда келтириши мумкинлиги айтилмоқда.

Марказий ҳимояни эса инглиз футболида порлаб келаётган иқтидорли Дин Хёйсен билан тўлдириш режалаштирилган. Бу футболчи Англия футболида ўзининг физик кучи ва ўйинни яхши ўқий олиши билан аллақачон кўпчиликнинг эътиборига тушган.

Хаби Алонсонинг ушбу талаблари “Реал” раҳбарияти томонидан қизғин муҳокама қилинмоқда. Агар келишув муваффақиятли якунланса, испаниялик мутахассис яқин келажакда ўзининг севимли жамоасига мураббий сифатида қайтиши мумкин. Бу эса мадридлик мухлисларнинг ҳам интизорлик билан кутаётган янгиликларидан бири бўлиб қолмоқда. «Замин»ни Telegram’да ўқинг!